Ólim – toı emes. Bir shańyraqtyń, bir áýlettiń qaıǵysy. Sondyqtan qaıǵyǵa batyp, qınalyp otyrǵan úı ıelerine janaza kúni astaý-astaý et astyryp, múshelep jilik taratý durys bolmasa kerek-ti. Ókinishke oraı, kóp jerlerde máıit úıden shyǵysymen-aq, zırat basyna barmaı yǵysyp qalyp qoıǵan kisiler japa-tarmaǵaı dastarhanǵa umtylady. Qara jamylǵan áıelder ishki úıde ańyrap otyrǵanda, ata saqaldary aýyzdaryna túsken el aǵalarynyń irgede maljańdap súıek mújip otyrǵany birtúrli ersileý kórinedi eken. Al álgi aýyr qaıǵy qabyrǵalaryna batyp, taıaq ustap qalǵan aǵaıyn solarǵa sháı tasyp, qyzmet kórsetip áýre. Tipti, muny aıtasyz, máıit úıden shyqpaı-aq, janazasyn kútpeı tabaq-tabaq palaý tarata bastaıtyn jamaǵat ta bar.

Bul týrasynda 2009 jyly QMDB-nyń Orta Azıa men Qazaqstan musylmandary amal etetin Hanafı mázhabyna saı daıyndalǵan pátýa ne der eken? «Qaraly úıdiń turmysy aýyr nemese bireýlerge qaryzy bolsa, olardyń odan ári qaryzǵa batyp as berýleri durys emes. Ol úıden as shyǵartpaý kerek. Taǵamdy týysqandary, jora-joldastary nemese kórshileri úıinde jasaýyna bolady. Ózderi jaqyndarynan aırylyp qaıǵyryp otyrǵan úı ıelerine tamaq ázirletip, kisi kúttirip qoıǵan durys emes. Máıitti birneshe kún jatqyzyp qoıyp, qonaq kútýdiń qamyna kirisý kúná». Jón-aq. Endeshe, osy bátýaǵa nege toqtamaımyz, aǵaıyn? Qaıǵydan qabyrǵasy qaıysyp, qara jamylǵan úıde qaljyń qaǵysa qarqyldaı kúlip, ezýimizden maı aǵyza kekirik atýymyzdyń endigi jerde jóni bola qoımas, sirá...

Siz ne deısiz buǵan?

Bekjigit Serdalynyń Facebook-tegi paraqshasynan