Bul eki arý bizdiń qazaqtyń júregin bir vıdeomen-aq jaýlady. Máskeýde turatyn Lıza men Nastá búginde Qazaqstanǵa tanymal bolyp úlgerdi. Orystyń qos arýyn tanytqan olardyń «Moskva  qazaqsha» atty YouTube jelisinde shyqqan beınematerıaldary edi. Onda boıjetken qyzdar Máskeýdegi túrli ásem kósheler men ǵımarattardy qazaq tilinde tanystyrady. Qyzdardyń eńbegi úshin otandastary bastarynan sıpalaı qoımas, alaıda Qamshy.kz aqparat agenttigi muny erekshe baǵalady. Qazaq tilinde bir aýyz sóz bilmeıtin keıbir qazaq dókeılerinen góri ana tilimizde saıraǵan ózge ulttyń qyzdaryn janyna jaqyn sanadyq da, suhbattasýǵa asyqtyq. Nastá men Lıza nege qazaq tilin tańdaǵan, qazaq tiline degen mahabbattary qaıdan paıda boldy, osy jáne basqa da suraqtarǵa jaýap aldyq. Ekeýi de – Máskeý memlekettik lıngvısıkalyq ýnıversıtetiniń stýdentteri.

Nastá men Lıza

Qamshy.kz: Nege qazaq tilin tańdadyńyzdar? Nege qyzyqtyńyzdar?

Elızaveta Osıpova: Ýnıversıtette tildi biz tańdamaımyz, degenmen bizdiń tańdaýǵa qazaq tili túskenine qatty qýandyq. Budan buryn men fransýz tilin úırenip júrdim. Keıin qazaq tiliniń baı, áýezdi ekenin baıqadym da, eriksiz ǵashyq boldym. Men úshin qazaq tili taza aýanyń tynysyndaı...

Qamshy.kz: Qazaq tiline degen mahabbat qaıdan paıda boldy, múmkin bireý sebepker bolǵan shyǵar?

Anastasıa Reshetnıkova: Rasynda, qazaq tiline mahabbatymyz erekshe. Gramatıkasy eýropalyq tilderdiń eshqaısysyna uqsamaıdy. Árbir sózinde úlken tarıh jatyr. Onyń maǵynasyn túsiný qıyn, bizdi qyzyqtyryp turǵany da osy.

Qamshy.kz: Tildi meńgermeı, bilmeı júrgen kezderińizde Qazaqstan, qazaq tili degende oılaryńyzǵa birinshi ne keletin edi?

Elızaveta Osıpova: Qazaqstan, qazaq halqy jaıly aqparat bizde bolǵan joq desek te bolady. Alǵashqy sabaqta Qazaqstan degende kóz aldyma dala, jaıylyp júrgen túıeler, sosyn prezıdent Nursultan Nazarbaev elestedi. Muny qazir oılasam, óz-ózimnen uıalyp ketemin. Al qazirgi ýaqytta biz memlekettiń áleýmettik, ekonomıkalyq jańalyqtaryn, oqıǵalaryn baqylap otyramyz. Qazaqstan týraly kóp aqparat jınadyq.

Elızaveta Osıpova

Qamshy.kz: Qazaqstanda boldyńyzdar ma?

Anastasıa Reshetnıkova: Men Qazaqstanda úsh ret boldym. Birinshisinde ýnıversıtette birge oqyǵan stýdenttermen birge Almatydaǵy aýdarmashylar konferensıasyna qatysyp qaıttyq. Odan keıin qazaq tili boıynsha jarysqa bardym. Úshinshi ret Astanadaǵy Eýrazıalyq ulttyq ýnıversıtette tájirıbeden óttik. Bul saparlarym Qazaqstan týraly jetik bilýime sebep boldy.  

Elızaveta Osıpova: Al men Qazaqstanda bolǵan emespin, biraq barý – úlken armanym.

Qamshy.kz: Lıza, siz barmaǵan ekensiz. Aıtyńyzshy, Qazaqstan halqyn qalaı elestetesiz?

Elızaveta Osıpova: Qazaq halqy – óte qonaqjaı. Qonaǵynyń aldyna bar jaqsysyn úıip-tógedi. Halqy jaıly sekildi. Barsam, ózimdi óz úıimde júrgendeı sezinetinime esh shúbám joq.

Qamshy.kz: Qazaqstan jaıly ne bilgilerińiz keledi?

Elızaveta Osıpova: Meni Qazaqstannyń tarıhy men dástúri qyzyqtyrady. Ár sabaq saıyn ol memleket jaıly jańa, buryn-sońdy estimegen aqparattardy bilip jatamyn, sabaq sonysymen qyzyqty ótedi.

Qamshy.kz: YouTube kanaldaryńyzda kóbine qazaqtildi kórermender qoldaý kórsetip jatady, al Reseıde sizderdiń qazaqsha blogtaryńyzdy qalaı qabyldaıdy? 

Elızaveta Osıpova: Ótken aptada aýdarmashylar konferensıasynda Nastá ekeýmiz jobamyz jaıly tolyǵyraq aıtyp berdik. Qatysýshylar bizdi qoldady, jobamyzdyń kreatıvti, bolashaǵy zor ekenin aıtyp qýantty. Otandastarymyz bizdi qoldaıdy. Árıne, rızamyz!

Qamshy.kz: «Moskva qazaqsha» qazir kádimgideı tanymal? Bul blogty júrgizýdegi maqsattaryńyz qandaı boldy?

Anastasıa Reshetnıkova: «Moskva qazaqsha» arqyly biz qazaqstandyqtardy Máskeýdiń kórikti kóshelerimen, qalanyń tarıhymen, mádenıeti jáne sáýlet ónerimen tanystyrǵymyz keledi. Ári reseılikterdiń de qazaq tilin úırenýge degen yntasyn arttyrýdy maqsat etip otyrmyz. Osy joba arqyly Qazaqstan men Reseıdiń qarym-qatynasyn nyǵaıtsaq deımiz.

Anastasıa Reshetnıkova

Elızaveta Osıpova: Iá, bul mádenı dıplomatıa sıaqty...

Qamshy.kz: Tanymal bolyp ketedi dep oıladyńyzdar ma?

Elızaveta Osıpova:  Jo-o-oq! Biz úshin kórermenniń ystyq yqylasy mańyzdy. Qalaı qabyldaıdy dep qobaljyǵan edik, alaıda bári sátti shyqty. Muny vıdeodaǵy pikirlerden-aq baıqaýǵa bolady. Bul jobany bastaǵanymyz beker emes dep oılaımyn. Qoǵamǵa, halyqqa paıdamyz tıse bolǵany...

Qamshy.kz: Qazaq tilinen ózge tilderdi bilesizder me? Qazaq tilin úırený qanshalyqty qıyn boldy?

Elızaveta Osıpova:  Joq, bilmeımin, biraq túrik tilin úırengim keledi. Shyny kerek, qazaq tilin úırený óte qıyn boldy. Qıyndyq týdyrǵany – qazaq tilindegi jalǵaý. Orys tilinen qazaq tiline aýdarǵanda kálkaǵa salyp ketemin. Onyń ústine aksent te qatty baıqalady. Biraq ýaqyt óte kele bul olqylyqtardyń bárin jeńemin dep senemin. Qazaq tilinde bulbulsha saıraıtyn bolamyn.

Qamshy.kz: Qazaq tilinde qandaı kitap oqydyńyzdar, qandaı ánderdi bilesizder? 

Anastasıa Reshetnıkova: Qazaq tilinde biz Abaıdyń, Muqaǵalı Maqataevtiń óleńderin oqydyq. Al eń súıikti áńderim –  «Dýdar-aı», «Aspanǵa qaraımyn», «Armandastar» jáne maǵan Son Pascal-dyń ánderi qatty unaıdy.

Qamshy.kz: Qandaı aqyn-jazýshylardy jáne ánshilerdi bilesizder?

Elızaveta Osıpova: Bul tiziminiń kóshin bastaıtyn árıne, Abaı Qunanbaev. Muqaǵalı Maqataevty, Muhtar Áýezovti jaqsy bilemiz. Al qazaq ánshilerinen Álibek Dinishev pen álemge tanymal Dımash Qudaıbergendi bilemiz ári tyńdaımyz.

Qamshy.kz:  Qazaq dostaryńyz kóp pe?

Anastasıa Reshetnıkova: Men Qazaqstanǵa barǵanda birneshe qazaqpen tanystym. Qazirgi ýaqytta jeli arqyly ara-tura aralasyp turamyz.

Elızaveta Osıpova: Meniń de qazaq dostarym kóp. Alaıda olarmen Qazaqstanda emes, ózge memleketterde tanysyppyn. Máselen, Ulybrıtanıada Regına degen almatylyq qyzben tanystym. Ekeýmiz – jaqyn dostarmyz.

Qamshy.kz: Jaqyndaryńyzǵa qazaq tilin úıretesizder me?

Anastasıa Reshetnıkova: Árıne, men ǵana emes, jaqyndarym da tilge qyzyǵady. Ata-anam keı sózderdi bilse de sóılem quraı almaıdy. Sonda da tyrysady. Meniń qazaqsha sóılegenime qyzyǵady.

Elızaveta Osıpova: Qazaq ánderin tyńdaıtyn dostarym kóp. Olar da keıbir sózderdi biledi. Oǵan yqpalymnyń tıip jatqanyna tek qýanyshtymyn.

Qamshy.kz: Bolashaqtaryńyzdy qazaq tilimen baılanystyrasyzdar ma?

Elızaveta Osıpova: Iá, árıne! Meniń dıplomat bolǵym keledi. Magıstratýranyń ekinshi kýrsynda oqyp júrgenimde Reseı Syrtqy ister mınıstrliginde tájirıbeden óttim. Bolashaqta Reseı men Qazaqstan arasyndaǵy dostyq qarym-qatynasty nyǵaıtý úshin jumystar atqarǵym keledi. Jáne qazaq tilin úırengisi keletin stýdentter men qazaqstandyqtar úshin basqa da qyzyqty jobalar jasaýdy armandaımyn.

Qamshy.kz: Jalpy qazir ne istep júrsizder, qaıda jumys isteısizder?

Anastasıa Reshetnıkova: Qazir men aqparat agenttiginde tilshi bolyp jumys isteımin.

Elızaveta Osıpova: Men sarapshy bolyp jumys istep júrmin. Keı-kezderi aýdarmamen aınalysamyn.

Qamshy.kz: Qazaq jigitine turmysqa shyǵar ma edińizder?

Elızaveta Osıpova: Ómir tosyn syılarǵa toly ǵoı. Alda ne kútip turǵanyn bilmeısiń. Qazaqstanda birneshe kún turýǵa qarsy bolmas edim. Al qazaq jigitine keler bolsaq, mahabbatta ultqa bólinýshilik bolmaý kerek. Taǵdyryma qazaq jigitin jazsa, bas tartpaımyn. Tipti ol jigit ózge ult ókilderinen bolsa da eń bastysy - súıý. 

Qamshy.kz: Suhbattasqandaryńyzǵa raqmet! Ár isterińizge bereke bersin!

Suhbattasqan: Gúlim Jaqan