Elimizge belgili kásipker Marǵulan Seısembaı Facebook áleýmettik jelisindegi paraqshasynda ózine qysym keltirilýine baılanysty áleýmettik belsendiligin doǵaratynyn aıtyp, post jazdy, dep habarlaıdy Qamshy.kz aqparat agenttigi.

Onyń aıtýynsha, QR Bas prokýratýrasy Aláns bankine qatysty eski qylmystyq isterdi qaıta jandandyryp otyr eken. 

"Dostar, 2018 jyldyń 24 jeltoqsanynda, Qazaqstan Respýblıkasynyń Bas Prokýratýrasynyń janyndaǵy mekemearalyq tergeý toby, meniń "Strategıalyq bastamalar forýmynan" keıin, jáne meniń áleýmettik belsendiligim úshin Aláns Bankige qatysty eski qylmystyq isterdi qaıta jandandyrdy. Bul isterdiń birneshe ret tergelgenine, olardyń kóptegen baptarynyń eskergenine qaramastan tergeý toby eski materıaldardan jańa is quramaqshy. Men eshbir isten kúnám bar dep qoryqpaımyn. Biraq eger kerek bolsa meni kináli etip qoıa alatyny barshamyzǵa belgili jaǵdaı.

Aláns banki jáne odan nesıe alǵan kompanıalardyń jumyskerlerin qaıta-qaıta shaqyryp, tergep mazalaýda.

Osyǵan oraı, men ózimniń áleýmettik belsendiligimdi kúrt qysqartamyn.

Birinshiden, Tuńǵysh Prezıdent saıabaǵyndaǵy "Business lifehacker” tobynda bıznes máselelerdi talqylap keńes beretin tańǵy serýenimdi toqtatamyn. 

Ekinshiden, Nomad Explorer uıymdastyrý tobynan shyǵamyn. "Ońtústik ańyzdary" ekspedısıasynyń uıymdastyrý jumystaryn uıymdastyrý komıtetine tapsyramyn.

Úshinshiden, "2-shi jastyq" tobynan shyǵamyn. 

Tórtinshiden, "Qońyr ýnıtaz" fleshmobyn toqtatamyn. 

Besinshiden, “Alma museum” murajaıymen "Almaly jumaq" qoǵamdyq qoryn jeke balansqa shyǵaryp ózimnen bólip tastaımyn.

Altynshydan, memlekettik muǵalimderdi qoldaýǵa arnalǵan "Qalam” qoryn jeke balansqa shyǵaryp ózimnen bólip tastaımyn.

Jetinshiden, elimizdiń ájethana máselesin kóterip talqylaýdy toqtatamyn. 

Segizinshiden, jastarǵa bıznes jóninde dáris oqyǵandy toqtatamyn. 

Toǵyzynshydan, buqaralyq aqparat quraldaryna suhbat bergendi toqtatamyn. 

Onynshydan, belsendilik kórsetip jańa bastamalardy usynýdy toqtatamyn.

Men buryńǵydaı óz elime degen súıispenshilikti saqtap, elimizdiń damýyna ýles qosyp, óz ornymda qabiletimdi aıamaı adal isterdi alǵa júrgize berýge tyrysamyn.

Qurmetpen, Marǵulan!" - dep jazady kásipker.

Usynǵan: Nazerke Labıhan