AQSH-tyń burynǵy memlekettik hatshysy  Djon Kerrı halyqaralyq saıasatta Donald Tramptyń júrgizip otyrǵan saıasatyna kóńili tolmaıtynyn málim etti. Ol óz sózinde «Tramp búkil álemniń aldynda Amerıkany masqara etti» dep málimdedi.

–Ol Amerıkanyń demokratıalyq qundylyqtaryn jermen jeksen etti. Álemniń aldynda AQSH-tyń bedeline nuqsan keltirdi, masqaramyzdy shyǵardy. Amerıkany tórkúl álemnen oqshaýlap tastady. Ekinshi dúnıejúzilik soǵystan keıin  burynǵy AQSH basshylary qurǵan aláns pen irgetasy myqty ınstıtýttarǵa qaýip tóndirdi. Biz alǵa emes, artqa qaraı sheginip baramyz.

Men ondaǵan jyldar boıy AQSH bıliginde, memlekettik qyzmette jumys istedim. Amerıka múddesine saı eldiń syrtqy saıasatyn júrgizdim. Biraq dál Donald Tramptaı eldiń ishine iritki salǵan, ulttyń qaýipsizdigin oılamaıtyn,  AQSH-tyń abyroıyn tókken áperbaqan adamdy kórmedim. Tvıtter arqyly saıasat júrgizip, Amerıkany  uıatqa qaldyratyn mundaı adamnyń Aq úıde otyrýǵa quqy joq,–dedi ol Demokratıalyq partıa ókilderiniń aldynda sóılegen sózinde.

Osyǵan baılanysty ol 2020 jyldyń qarashasynda bastalatyn prezıdenttik saılaýǵa daıyndyqty qazirden bastaýǵa shaqyrdy. 2013-2017 jyldary AQSH-tyń memlekettik hatshysy bolǵan Djon Kerrı «ol úshin búginnen bastap saılaýaldy kampanıasyna jarna tóleýdi bastap ketý kerek» ekendigin aıtty.

Eskerte keteıik, Donald Tramp ta keler jyly prezıdenttik saılaýǵa túsetinin málim etkeni belgili. Ótken saılaýda utylyp qalǵan Demokratıalyq partıa osy joly Tramptyń aıaǵyn tusaýǵa baryn salady. Qazirdiń ózinde Donald Trampqa qarsy básekeles retinde demokrattardyń atynan saılaýǵa túsýge AQSH-tyń burynǵy vıse-prezıdenti Djo Baıden, senator Bernı Sanders, sonymen qatar burynǵy memhatshy Djon Kerrı  nıetin bildirdi.