Muzafar Álimbaı (1923-2017 jj.) — Qazaqstannyń Halyq jazýshysy, Memlekettik syılyqtyń laýreaty, qazaq ádebıetinde soǵys surapylyn bastan keshken qalamger, balalar aqyny.

Búgin nazarlaryńyzǵa Muzafar atanyń birqatar danalyq sózderin usynyp otyrmyz.

«Uıqysy qanbaıtynnyń baqyty janbaıdy».

Jatyp isherdiń jarylqanǵanyn kórgen jan joq. Baǵym jansyn deseń, barsha jurttan buryn tur. Kóp eńbek et, jemisin ter. Enjarlyqqa salynba.

***

«Semserdiń bolat bolýy shartty, al bolattyń semser bolýy shartty emes».

Jaqsynyń asyl bolǵany abzal. Sol asyldyń jamandyqqa úıirliginen saqtasyn de. Nemese jaqsy nárse jasyqqa aınala kórmesin.

***

«Qaqpańnyń qaǵylǵany – dosyńnyń saǵynǵany».

Shyn tileýqor adam saharanyń qaı túkpirinen bolsa da shaqyrtpaı-aq salyp uryp jetip keledi. Al sondaı dosyńdy óziń saǵynyp izdeı aldyń ba?

***

«Úsh adamdy jamandaǵannan bez».

Jan balasynyń jaqsylyǵyn kóre almaǵannan jaqsylyq kútýge bolmaıdy. Áldebireýlerdiń syrtynan sókken saıyn, ózine-ózine súısinetin adamdar kezdesedi. Qudaı biledi, ondaı jandar bylaı shyǵa berip seni de sylqıta jamandaıdy. Sondaılardan saqtan.

***

«Jaqsy sóz nárlendiredi, jaqsy dos árlendiredi».

Adal janmen aralassań, ózińe tyń kúsh-qýat paıda bolǵanyn sezinesiń. Aradaǵy asyl sóz seni saqaıtady, rýhanı toıǵanyńdy bilesiń. Bul - shúbásiz shyndyq. Osyndaı dostyq, tileýqorlyq kóńilge ne jetsin!

***

«Baıypty bolý aıypty bolýdan qorǵaıdy».

Ońy men solyna oı jiberip, aqylǵa salyp kirisken adam jańsaq baspaıdy. Osy talapty este ustaǵan durys.

***

«Maımyldyń mıy oınaýǵa jetkenmen, oılaýǵa jetpeıdi».

Eshkim de óz bolmysynan asyp kete almaıdy. Jaratqan qandaı qasıet, qabilet berdi, onyń ómiri soǵan táýeldi.

***

«Oryndy sóz – myń jyldyq, orynsyz sóz – myljyńdyq».

Oıly sóz uzaq jasaıdy, urpaqtan-urpaqqa aýysady, ǵıbraty mol bolady. Artyńa qaldyrar sózińdi oılap, úılestirip aıtýdy ádetke aınaldyrýǵa tyrys.

***

«İlgeri bassań, kúndeýshiń bar. Keri ketseń, tildeýshiń bar».

Atyńnyń basy ozsa, kóre almaıtyndar shyǵa keledi. Olar ondaı kezde birden shaýjaıyńa jarmasady. Al eldiń sońynda qalsań, kúletinder de tabyla ketedi.

***

«Bilgir bolsań, aǵaıynnyń arasyn ashyp aıtpaı, qosyp aıt».

Bilikti jan eshkimge jalpaqtamaıdy. Jandaıshaptanyp joqty-bardy sóz etpeıdi. Neni bolsa da, óz kezegi kelgende qozǵap, uta sóıleıdi. Eldi oılaıdy, jurtty birlikke shaqyrady.

(jalǵasy bar)

"Egemen Qazaqstan" gazetiniń ártúrli sanynan toptastyryp, usynǵan: Maqpal Sembaı