Tursańshy, býdılnıgińniń óziń jaqsy kóretin áýendi oınaǵaly on mınýt boldy ǵoı. Keshigesiń. Tur! Turmaıtynyń bar, nege telefondy shyryldatasyń da qoıasyń? Qanshama ret aıttym! «Jalqaýlyǵyńdy jeńýge talpyn, áreket qyl, eńbek et! Nátıjeli bolary anyq!» Átteń, estimeısiń... Tipti kózderińdi áreń ashasyń ǵoı. Ýh, táýbe, turdyń-aý. Qymbattym, tezirek kıin, áli jýynyp, tańǵy asyńdy ishýiń kerek...

Tanys bolyńdar! Bul - meniń jaqyn dosym. Óziniń azdap jalqaýlyǵy bar. Biraq oıyna alǵandy aıaqtaýǵa nıetti jan. Sabaǵy da jaqsy. Ózge jandarmen de qarym-qatynasy jaqsy. Eń bastysy - ımannan habary bar. Átteń, átteń...  Nápsisine erip, qý basyn sájdege jyǵa almaı júrgen jaıy bar... Men sharasyzbyn. Eshbir isine kómektese almaımyn. Aqyl aıtamyn... tyńdamaıdy. Sebebi, meni estimeıdi. Tipten, sezbeıdi. Anda-sanda kóz qyryn salyp turady. Qalaýymen emes, kerek bolǵandyqtan.  Keıde dál jandy jerimnen aıaǵymen basyp ta ketedi, tebedi de... meniń esh  jerim aýyrmaıdy. Óıtkeni, sezbeımin.

Qymbattym, sen «dos» degen ataý alǵandardyń bárine syryńdy jaıyp salasyń. Tek men ǵana... eleýsiz qalamyn. Olarmen qaljyńdasasyń, birge as ishesiń, oınaısyń, áńgimelesesiń... al, men she? Shyn máninde, bárinen de saǵan eń jaqyny menmin ǵoı. Qaıda bolsyn, qashan bolsyn, sen dúnıege kelgennen bastap, senimen birgemin ǵoı. Qalaı túsinbeısiń? Saǵan jany ashyp, seni túsinetin menen ózge eshkim joq. Dostaryńnyń qasyńda kúlip júresiń. Jáne de ómiriń qyzyqty dep kórsetkiń keletindeı. Al, bólmeńe kelip, eńirep jylaǵan kezderińdi menen ózge eshkim kórgen emes. Qane, sondaı bir jandy atap kórsetshi? Joq! Ataı  almaısyń... Sebebi, ondaı jan joq. Al, men tek janym ashyp, qarap qana tura alamyn. Qansha jerden qandaı jyly sóz aıtyp jubatqym kelgenimen, qolymnan kelmeıdi. Óz sózimdi, aıqaıymdy, áńgimemdi ózimnen ózge estimeıdi.

Janym, dostaryńmen ómiri birge bolmaısyń ǵoı. Tek men ǵana senimen birge kórge deıin birge baramyn. Keıde qarańǵy jerlerde senen adasyp qalatyn kezderim bolady. Sondaı kezderde qandaı qorqatynymdy bilseń... Jaraıdy, meniń kúıim mańyzdy emes. Janym, men seni sezip, túsinetindeı, sen de me túsinetin bolsań, ómir budan da qyzyqty bolar ma edi? Kim bilsin!? Shyn máninde, seniń qandaı jalqaý, meıirimdi, maqtanshaq, kishipeıil, qaljyńbas ta, sezimtal, kúlkili de, muńly ekenińdi menen ózge jan ańǵarmaıdy da, bilmeıdi.

Kórkemim, shirkin, sen meniń  kim, álde ne ekenimdi bilseń ǵoı. Álbette, ol oryndalmas armanymnyń  biri...

Biraq bir nárseni bil: sen jaqsy, jaman bolsań da,  men seni  eshqashan tastamaımyn. Sen meniń negizimsiń, egizimsiń, aıyrylmas syńarymsyń. Qalasań da, qalamasań da men senen aıyrylmaımyn. Ekeýmiz birge jaratylǵanbyz, birge ólemiz de. Ómirimiz, taǵdyrymyz bir. Júrer jolymyz, kórer muńymyz, qýynyshymyz, tiler tilekterimiz de, armanymyz da bir. Sen meniń ómir mánimsiń, sánimsiń, ánimsiń. Álbette, sen úshin meniń mańyzym, bar-joǵym báribir bolar. Sebebi, men seniń bar bolǵany - KÓLEŃKEŃMİN.

Maqpal Sembaı