/mamamyzdy saǵyndyq, á.../

«Osy seni-aı! Anaý kórshiniń qyzyn qarashy!? Oı, keremet qoı, shirkin! Bárin isteıdi! Tamaq ta jasaıdy, úı de jınaıdy!... Toqyma da toqıdy! Sabaǵyn da oqyp, oınap ta úlgeredi! Al, sen bir sháıdiń ydysyn «on» saǵat jýasyń! Onyń ózine ydystardyń bárin shaǵyp bittiń! Qolyńa tıgen ydystardyń bári nege "qanattanyp" ketedi osy?»...

Iá, kishkentaı kezde anam osylaı ursatyn! Sebebi, rasynda bes tal keseni "on" saǵat jýatynmyn. Onyń ózine, men jýǵan ydystardyń sheti ketik bolyp shyǵatyn. Sebebi, aıyr-kúrek ustap, ákemniń janynda syrtta kóp júrgendikten, "kezdeısoq" ydys jýý "baqyty" buıyryp qalsa, shóp laqtyryp, otyn tasyǵandaı "gúrsildetip" isteıtinmin de, aqyry osyndaı bolatyn. Túıesiń dep te ursatyn.

Sonda oılaıtynmyn... «Áı, shirkin, sol kórshiniń qyzynyń qaı jeri artyq? Qalasa, sol qyz qyzdary bolsynshy... ertip "ápkeleıin be osy"...» Al, kórshiniń qyzymen oınaı qalsań «Túh, mamam ursa beredi. Seni maqtaı beredi maǵan. «Ol bárin isteıdi, tamaq ta jasaıdy, kir de jýady, oınap ta úlgeredi, sabaǵyn da jaqsy oqıdy» - dep... Men oǵan «seni maǵan maqtaıdy» dep, bir kúlip alatynbyz. Osy sózderdi estigende, «kim - kimdi aldap júr» dep oılaıtynmyn. 

Baqsam, jaqsy bolsyn degenderi eken ǵoı. «Jaqsydan úıren, jamannan jırenniń» tájirbıege asyp jatqany osy eken-aý... Balalyqpen shala túsingen ekenbiz.

Qazir sol kórshiniń qyzy da, men de adam boldyq. Sol sózderdiń de "eńbegi" bar ma dep qoıamyn keıde. "Qazir men jýatyn ydystar synbaıdy, ketikteri de joq, ydystar "ushpaıdy" qazir, toqyma da toqyp júrmin, neshe túrli tamaqtar pisirip úırendim, anaý-mynaýdy oqyp júrmin, aınalama barynsha kómektesemin... taǵysyn taǵy... Mama-aý, sol "túıeńiz" búginde tyrbańdap ómir súrip júrgen adamdar qataryna qosyldy. Mama-aý, men kishkentaı "dáý" boldym... Mama-aý, kórshiniń qyzy rasynda keremet eken ǵoı! Mama-aý, qashan kelip dámdi tamaǵymnan dám tatasyz?..." degim keledi...

PySy: ...keıde abaısyzda "ádeıi" qolymnan kez kelgen ydysty túsirip alǵym keledi. Solaı ishińdegi ókpeń, muńyń, nazyń shyǵatyndaı...

Sizge de Anańyz kórshiniń qyzyn úlgi etýshi me edi? Búginde Siz de balańyzǵa kórshiniń balasyn aıtyp, ursatyn shyǵarsyz, á?

Maqpal Sembaı