Almaty oblysynyń ákimi Amandyq Batalov Taldyqorǵan qalasyndaǵy B. Rımova atyndaǵy drama teatrynda turǵyndar aldynda esep berý jıynyn ótkizip, oblystyń damýy týraly negizgi baıandamasynan keıin turǵyndar suraqtaryna jaýap berdi. Jıynǵa QR Prezıdent Ákimshiliginiń memlekettik ınspektory Jaısań Ahmetov, Densaýlyq saqtaý vıse-mınıstri Lázat Aqtaeva, «Báıterek» UBH basqarma tóraǵasy Aıdar Arıfhanov qatysty.

Jıynda zaldaǵy qatysýshylardan aýyzsha jáne jazbasha qoıylǵan, sonymen qatar oblys ákimdiginiń zhetysu.gov.kz saıtyna joldanǵan jalpy sany 60-qa jýyq suraq tústi. Saýaldardyń mazmuny negizinen qalany gazandyrý jáne kógildir otynǵa qosýda áleýmettik áljýaz toptarǵa jeńildik qarastyrý, aýyz sýmen qamtý, aýlalardy abattandyrý, ortalyqtandyrylǵan jylý júıesine qosý, turǵyn úı alý, jol jóndeý sıaqty mańyzdy máselelerge qatysty boldy.

Taldyqorǵan qalasynyń turǵyny Temirlan Ózenbaev Taldyqorǵandaǵy jylytý qazandyqtaryn tabıǵı gazǵa qashan qosylatyny týraly surady. Gazǵa qosylsa birinshiden tólemi arzan bolar edi, ekinshiden ekologıalyq máselege yńǵaıly bolar edi dedi ol. Bul jóninde oblys basshysy A. Batalov: «Óte durys kóterilip otyrǵan másele. Qansha jerden fıltr qoısaq ta, qatty otyn paıdalanýdan shyqqan tútin ekologıaǵa keri áserin tıgizedi, shyǵaryndylary da kóp bolady. Bir qazandyqty gazǵa qosýǵa 900 mln. teńgeniń shamasynda qarjy qajet eken, biraq odan shyǵatyn jylý qýaty 22-den 50 Gkal-ǵa jetetin bolady. Sondyqtan aldaǵy ýaqytta qaladaǵy 5 qazandyqty túgeldeı gazǵa qosamyz», - dedi.

Tekelilik Mıra Bocharnıkova Tekeli qalasynda aýyr metaldar qaldyǵy jatqan orynnyń ekologıalyq zıany týraly másele kóterildi. Oblys ákimi bul problemany sheshýge bıylǵy jyly respýblıkadan qarjy bólinip, bastalatynyn aıtty.

Máselen, Panfılov aýdanynyń turǵyny Erlan Ospanov Penjim aýylyndaǵy aýrýhana 200 jyldan beri jekemenshiktegi ǵımaratty jalǵa alyp otyrǵanyn aıtyp, sol mekemege laıyqtap ǵımarat salyp berýdi surady. Sol sıaqty Qarasaı aýdanynyń turǵyndary ózderi turyp jatqan kóp qabatty úılerdiń ortalyqtandyrylǵan jylý júıesine qosylmaǵany, sol úshin qazandyq salyp berýdi ótindi. Oblys ákimi atalǵan máseleler boıynsha óz orynbasarlaryn turǵyzdy, olardyń aıtýynsha eki másele de bıylǵy jyldyń josparyna engizilgen, qujattary daıyndalýda.

Taldyqorǵan qalasynyń mańyndaǵy Merekelik saıajaıynyń turǵyny Baqytgúl Rahymbaeva saıajaıdyń elektrmen qamtylý máselesiniń sheshilgenine rahmet aıtyp, ondaǵy turǵyndardy aýyz sý problemasy qınap otyrǵanyn jetkizdi. Sonymen qatar urlyqtyń kóbeıgenin jáne ury ustalǵan kúnde bosatylyp jiberiletinin de atap ótti. Bul másele boıynsha qala ákimi aýyz sý júrgizýdiń jobalyq-smetalyq qujattary daıyn ekenin, tek respýblıkalyq búdjetten qarjy bólinýine baılanysty jasalatynyn aıtty. Oblys basshysy aýyz sý júıesiniń qurylysyn bastaýǵa búdjetten 100 mln. teńge qarastyratynyn jáne qala ákimdigine qurylys jumystaryn bıyl bastaýdy tapsyrdy. Saıajaıda urlyq jasaǵany dáleldengen azamattardyń jazaǵa tartylýyn jeke ózi baqylaýǵa alatynyn aıtyp, Polısıa basshylyǵyna olar týraly barlyq málimetti aldyna alyp kelýdi tapsyrdy.

Turǵyn úı alý, áleýmettik kómek qajettiligi jaıly aıtqan kóp balaly analarǵa járdemdesý sharalaryn qarastyrý, qamqorlyq jasaýǵa kásipkerlerdi tartý týraly tapsyrmalar berildi.

Raıymbek aýdanynyń turǵyny, jas maman Medet Baıjuma oblys basshylyǵynyń jumysyna aýdan turǵyndarynyń atynan rızashylyǵyn jetkizip, árbir aýdandaǵy jastar ortalyqtaryna bólinetin 10 gektar jerdi ıgerip, aýyl sharýashylyǵyna úles qosý jastar úshin úlken qýanysh ekenin aıtty.

Taldyqorǵan qalasyndaǵy Ǵ. Ormanov kóshesi, 48 úıdiń aýlasyn abattandyrý týraly saýalǵa baılanysty qala ákimi D. Shaltabaevqa bıylǵy josparlanyp otyrǵan aýlalardyń qataryna atalǵan úıdi qosymsha kirgizý týraly tapsyrma berildi.

Sonymen qatar saýaldarda sóz qozǵalǵan Balqash kóliniń jaǵalaýyn damytý, qaladaǵy kórkem gımnastıkaǵa arnalǵan zaldardy keńeıtip, jattyqtyrýshy shtattaryn qosý, Sharyn shatqalyn týrısik nysan retinde damytý jáne basqa da máselelerge qoldaý jasalatyny aıtyldy.

Jıyn sońynda oblys ákimi Amandyq Batalov esepti kezdeýge qatysqan, ózekti máseleler týraly saýaldar qoıǵan turǵyndarǵa alǵys bildirip, búgingi kúni problemalardy sheshýge Memleket basshysy tarapynan barlyq jaǵdaılar jasalyp otyrǵanyn aıtty. Eń bastysy, ár máselege tereń úńilip, jaýapkershilikpen jáne adamgershilik turǵydan qaraý kerektigin jetkizdi. Sondaı-aq kóterilgen máselelerdiń barlyǵy da nazarǵa alynyp, olardyń kezeń-kezeńimen sheshý qastyrylatyn bolady.

Oblys ákiminiń turǵyndar aldyndaǵy esep berý jıyny 3 saǵatqa sozyldy.