Almaty oblysynda «Nurly jol» baǵdarlamasy sheńberinde sońǵy tórt jylda 36 mektep, úsh balabaqsha, úsh qazandyq, 244 km ınjenerlik júıeler salyndy. Investısıanyń jalpy somasy 79,6 mlrd. teńgeni quraıdy, 22,7 myń jumys orny qurylǵan. Bul týraly búgin óziniń esep berý jıynynda Almaty oblysynyń ákimi Amandyq Batalov aıtty.

«Nurly jol» baǵdarlamasynyń arqasynda oblystyń tranzıttik áleýeti artyp, avtokólik joldarynyń sapasy jaqsardy.

Oblys basshysy jyl saıyn óńirde joldardy jóndeý men olardy kútip ustaýǵa 30 mlrd. teńgeden astam qarjy bólinetinin aıtty.

Jıynda sóz bolǵandaı, bıylǵy jyly «Taldyqorǵan - Óskemen», «Úsharal - Dostyq», «Kúrti - Býrylbaıtal», «Uzynaǵash - Otar» sıaqty avtojoldardy jańǵyrtý jobalary bastalǵan. Sondaı-aq «Altyn Orda» bazary aýmaǵyndaǵy jol 10 jolaqqa deıin keńeıtilýde.

«Osy jobalardyń ózine 2019 jyly 50,6 mlrd. teńge ınvestısıa ıgeriledi, 4,5 myń jumys orny qurylyp, onda oblys turǵyndary jumys isteıtin bolady», - dedi sózin qorytyndylap A. Batalov.