Kúni keshe kórshi balalarmen asyr salyp oınap júrgen balaqaı búginde ómir men ólimniń arasynda qaldy. 4 jastaǵy Astana turǵyny Nurqadyl Hıbadattyń boıynan qaterli isik tabylǵan. Qazaqstandyq dárigerler baryn salǵanymen asqynyp bara jatqan aýrýdyń betin qaıtara almaımyz dep ashyq aıtypty. Endigi úmit sheteldik mamandarda. Bul týraly Qamshy.kz aqparat agenttigi Eýrazıa birinshi arnasyna silteme jasap habarlaıdy.
 
Amandyq Hıbadattyń shańyraǵyna kenje balasynyń aýyrǵany qatty batqan. Osydan birneshe aı buryn ǵana ortalarynda oınap júrgen perzenti aıaq asty aýyryp, boıynan qaterli isik tabylǵanyn estigende eseńgirep qalypty. Áýelde Nurqadyldyń beti beri qaraǵanda bir jasap qalǵanymen, qýanyshtary uzaqqa sozylmaǵan.

«Ana men balada kúrdeli eki ota jasaldy. Alty kýrs joǵary dozaly hımıa terapıa berildi. Soǵan qaramastan isiktiń qaıta ósip jatqanyn anyqtap otyr. Bizdiń otandyq dárigerler qoldarynan kelgenin jasady. Endi aıtyp otyr qaıtalanyp ósken jaǵdaıda bizde ony emdeıtin protokol joq deıdi. Bizdiń qolymyzdan kelmeıdi deıdi», - deıdi balanyń ákesi Amandyq Hıbadatuly.

Ómirleriniń qyzyǵyn dertke qımaǵan ata-ana dereý sheteldik klınıkalarǵa habarlasyp qujattaryn jibergen. Balany emdeýge bolady, biraq quny arzan emes eken. Mysaly, Germanıada 280 myń dollar, Izraılde 300 myń, al Amerıkada 500-700 myń dollar aralyǵynda suraǵan. Qalta kóteredi-aý dep Túrkıany tańdapty. Em-domǵa 140 myń dollardaı qajet eken.   

«Qazirgi tańda 30 myń dollar týysymnan qaryz aldym. Sonyń syrtynda qolymyzda bar aqsha 50 myń dollar jınadyq. Onyń 30 myńyn qaryzǵa alyp otyrmyz. Endi emine ar jaǵynda 29 myń dollar kerek. Transplantasıa jilik maıyn aýystyrý, eger ózinikin aýystyrsa, 40 myń dollar, eger týysynikin aýystyrsa, donor onda 65 myń dollar», - dep aıtty Amandyq Hıbadatuly.

Kishkentaı Nurqadyldyń aǵasy men ápkeleri de ony saǵynyp júrgeni baıqalady. Onyń oıynshyqtary bir buryshta jınalyp turǵanyna biraz bolǵan. Úıdiń ishi de tym tyrys.  

«Nurqadyldyń jasy tórtte. Ol – bizdiń kenje baýyrymyz. Biz ony qatty saǵyndyq. Onyń úıge qaıtyp kelýin qalaımyz. Ol ózi ashyq bala. Úıde júgirip oınap júredi», - deıdi Tánzıla Hıbadat.

Telefon soqqan saıyn 4 jastaǵy balaqaı ákesine «Men úıge qaıtyp kelemin. Maǵan Qudaıym kómektesedi» - dep aıtady eken.  

«Eń birinshi týǵan týystarymyzdyń jáne osyndaı jaǵdaıǵa beıjaı qaramaıtyn qaıyrymdy halyqtyń arqasynda, mine, alǵashqy qarajatty jumsap emimizdi bastap kettik. Alǵysymyz sheksiz», - deıdi Nurqadyldyń anasy Juldyz Alpamsaqyzy.

«Kóp túkirse kól degen sóz beker aıtylmaǵan shyǵar» -  deıdi Amandyq Hıbadat. Búginge deıin barmaǵan jeri, baspaǵan taýy qalmapty. 140 myń dollar degen az qarajat emes, ony tabýǵa, jınaýǵa jaýyq kerek. Biraq, qaterli isik kútpeıdi, kún sanap asqyna beredi. 

«Malym -  janymnyń sadaqasy» - dep otyrǵan kishkentaı Nurqadyldyń otbasy bar dúnıe múlkin saýdaǵa shyǵarǵan. Kólik pen tehnıkadan bastap óz kúshterimen salǵan úılerine deıin satýdy kózdep otyr. Biraq esepteı kelgende onyń ózi emdeýge jetpeıtin kórinedi. Endigi úmit qaıyrymdy jandarda. Jomart jandar kómektesip jatsa, Túrkıada emdelip jatqan bala aman esen óz úıine óz eline oralýy ábden múmkin». 

Usynǵan: Nazerke Labıhan