AQSH-tyń memlekettik hatshysy Maık Pompeo Karakastaǵy elshilikten qyzmetkerlerin shyǵaratynyn aıtty. Mundaı sheshimge «Venesýeladaǵy jaǵdaıdyń nasharlaýy» sebep bolǵan. Pompeo sonymen qatar elde amerıkalyq dıplomattardyń bolýy AQSH is-áreketterine shekteý ekenin jetkizdi.

Alaıda, Venesýeladaǵy AQSH dıplomattarynyń jumysy Vashıngtonnyń syrtqy saıasatyna qalaı kedergi keltiretinin Pompeo ashyq aıtpaǵan.

«AQSH Karakastaǵy óz elshiligindegi barlyq qyzmetkerlerin osy aptada shyǵarady» dep málimdedi Memlekettik hatshy. Memlekettik departament muny seısenbi kúni habarlaǵan.

Pompeo, sondaı-aq, qyzmetkerlerin shyǵarý jáne elshilik qyzmetkerleriniń azaıtylýy týraly 24 qańtarda qabyldanǵan sheshimdi eske saldy. Memlekettik departament keıinnen shtattan tys shuǵyl áreket etetin qyzmetkerlerdi, sondaı-aq Karakastaǵy elshilerdiń otbasylaryn qaıtaryp alý týraly buıryq bergen.

23 qańtarda Venesýela opozısıasynyń jetekshisi Hýan Gýaıdo ózin Venesýela prezıdenti mindetin atqarýshy dep jarıalaǵan bolatyn. AQSH, Latyn Amerıkasy elderi jáne Eýropadaǵy keıbir amerıkalyq odaqtastar ony ýaqytsha memleket basshysy dep tanydy.

Al Reseı men Qytaı Nıkolas Madýrony zańdy prezıdent dep esepteıdi.

Nıkolas Madýro qańtarda AQSH-pen dıplomatıalyq qarym-qatynasyn úzetinin málimdep, amerıkalyq dıplomattardyń elden shyǵýyna 72 saǵat ýaqyt bergen. Biraq ol kezde elshilik qyzmetkerleri bul buıryqqa baǵynbaǵan.

Dúısenbi kúni Pompeo reseılik «Rosneft» kompanıasynyń AQSH-tyń sanksıalaryna qaramastan PDVSA-dan munaı satyp alýdy jalǵastyrýda ekenin aıtty. Onyń oıynsha,  «Rosneft» basshysy Igor Sechın Madýro júıesin saqtap qalýǵa kúsh salyp jatyr. «Rosneft» buǵan qatysty áli málimdeme jasaǵan joq.

Venesýeladaǵy jaǵdaı

Venesýela besinshi kún qatarynan elektr jaryǵynsyz otyr. Eldiń kóp bóligin elektr qýatymen qamtamasyz etetin gıdroelektrostansıalardyń birinde aqaý paıda bolǵan. Biraq, Madýro elektr jaryǵynyń óshirilýi AQSH-tyń is-áreketi ekenin alǵa tartty. Opozısıa, óz kezeginde, zaýyt pen elektr torabynda tehnıkalyq qyzmet kórsetýdiń joqtyǵyn aıtyp, bılikti kinálaýda.

Venesýelanyń ekonomıkasy quldyraýdyń altynshy jylyn, 1920 jyldary Veımar Respýblıkasy men 2000 jyldary Zımbabvede bolǵan krızısti bastan ótkerýde. Mıllıondaǵan venesýelalyqtar elden ketip qalǵan.

Saltanat Shynádil