Qymbat Ábildına depýtat Gúljan Qaraǵusovanyń qarttarǵa úı salý usynysyna jaýap berdi, dep jazady Qamshy.kz aqparat agenttigi Stan.kz saıtyna silteme jasap.

"Gúljan Qaraǵusovanyń aýzymen aıtylǵan myna jańalyqqa qatysty biz tereń fılosof, uly matematık Pıfagordan artyq aıta almaımyz: "Myqty zańyń bolǵansha, myqty salt-dástúriń bolsyn". Al endi dástúrdiń kókesi ol - ata dástúr. Ol qanmen keletin dúnıe, sonaý sen ult bolyp qalyptasýyń - erkińnen tys nárse. Jaratylystyń kúshimen qazaq degen ulttyń ókili bolyp týǵanbyz. Al endi qazaq degen barlyq baqytyn urpaǵymen ǵana baılanystyryp qoıǵan.

Men osy bıliktegi bıliktiń dámin tatyp alyp, bıliktiń maıly jiliginen dám kórgen, ózderi qartaıyp, sharýasy bitip tursa da, sol bılikten aıyrylǵysy kelmeıtin, sol bir kezde bılikte bolǵanyn óle-ólgenshe aıtyp, sony bir ózderine dańq kórip, mansap kórip, sony baq kóretin adamdarǵa men túsinbeımin (Gúljan Qaraǵusova 9 qyrkúıekte 69 jasqa keledi).

Ol óziniń balasyna der kezinde kóńil bólmegen, ata-anasyna kóńil bólmegen, solardyń qas-qabaǵyna qaramaǵan, solardyń janaryndaǵy shýaqty, meıirimdi, aınalalaıyndy, sharshap otyrǵan haldi kórmegen, qas-qabaǵyna qaramaǵan adamdar osylaı esepteıdi dep oılaımyn. Múmkin jetpeı otyrǵan otbasynda otyrǵansha ókimet jaǵdaıyn jasap qoıǵan jerde otyrýdy ol keremet dep oılar. Biraq, ol bizdiń qanymyzǵa kelmeıdi ǵoı.

Adam degen tek ishkenimen, jegenimen ǵana jaqsy ómir súrmeıdi. Ómiriniń mán-mazmunyn tek sonymen ǵana baǵalamaıdy ǵoı. Kez-kelgen jaratylys ıesi, joǵarǵy sana ıesi adam ǵana emes, anaý baýyrymen jorǵalaıtyn kishkentaı jorǵalaýshylardan, jándikterden, názik gúlge deıin, qysqasy tirshilik ıesiniń barlyǵynda bir-aq murat bolady. Ol murat - ósý, órkendeý, óz urpaqtaryn kórý. Ol haıýanattardyń da armany, qustardyń da armany.

Men túsinbeımin, sonda siz balańyzdy ósiredi ekensiz, balam úshin-balam úshin dep jantalasady ekensiz, al sosyn qartaıǵanda balańnan bólinip alyp turý degendi men kóz aldyma elestete almaımyn. Qazaqtyq qasıetti túsinbeıtin, qazaqı qasıetti baǵalaı almaıtyn, ata-anasynyń qas-qabaǵyna qaramaǵan, ata-ananyń tek iship-jep, toıǵanyna ǵana emes, ata-ananyń kózinde ne bar, júreginde ne bar, tileginde ne bar dep, ata-anasynan hal suramaǵan, janaryna qaramaǵan, ata-anasynyń kóńilin, qýanyshyn túsinip kórmegen adamdar ǵana mundaı tirlik jasaıdy meniń uǵymymda.

Men mysaly úshin qazir tirideı jumaqqa úlpildetip aparam dese, beınetimnen bárinen alyp ketip, toıǵan jerińe otyrǵyzam dese kelispeımin, men toıǵan jerde júretin ıt emespin ǵoı, men urpaǵymnyń óskenin kórgim kelmeı ma, men osy ýaqytta qarttyq-qazynalyqqa jetkenimde, ómirden túıgen-bilgenimdi, súıgenimdi, qazaqtyń jaqsylyǵyn urpaǵyma ertegi ǵyp, maqal-mátel qylyp, sheshendik sóz qylyp aıtpaımyn ba? Etinen ótkizip, súıegine jetkizip, qazaqtyń qasıetin jas qazaqqa jetkizbeımin ba, meniń úlkendigim sol emes pa?

Men nege ol jerde jaǵdaıym jaqsy bolsa boldy, balam maǵan tamaq istep bermeı-aq qoısyn, kelinim meni jaqtyrmaı-aq qoısyn dep, nege men bárin aqshaǵa tirep qoıýym kerek? Aqshadan basqa qundylyq joq pa? Tek qana ata-ananyń qadirin bilmeıtinder ǵana osyndaı qadamǵa barady dep esepteımin, bul meniń kózqarasym", - deıdi Qymbat Ádilbına.

Usynǵan: Nazerke Labıhan