Byltyr Shelek aýylyndaǵy ortalyq aýrýhanada qudyqqa túsip qaza tapqan eki santehnıktiń jaqyndary olardyń ólimine basshylyqty kinálaıdy dep habarlaıdy Qamshy.kz aqparat agenttigi KTK arnasyna silteme jasaı otyryp.

«Ómirbaı qudyqqa túsken boıda jan tapsyrǵan. Biraq, ol jansaqtaý bóliminde alty saǵat jatty. Ólip qalǵan soń, ony qasyndaǵy áriptesimen birge balkonǵa shyǵaryp tastaǵan eken. Aýrýhanaǵa qyzymyz ekeýimiz barǵanda bizge mán-jaıdy eshkim túsindirgen joq», – deıdi marqum Ómirbaı Estemesovtyń áıeli Elmıra.

Marqumnyń ápkesi de inisi bolǵan jaıtqa Shelek aýrýhanasy aýylsharýashylyq bóliminiń meńgerýshisi Árken Úshúrovty kináláp otyr.

«Qudyqqa eń birinshi meniń baýyrym túsip ketti. Tehnıkanyń damyǵan zamanynda káriz qudyǵyna adamdy túsirip óltirý ne sumdyq? Arken Ushyrov inimniń jýastyǵyn paıdalanyp, ony ártúrli jumystarǵa jumsaıtyn. Tipti úıiniń jumysyna deıin istetken. Men inimniń máıitin kórdim, ústi-basy kógerip ketken. Nege bular sý qubyryn qaraıtyndardy burynnan shaqyrmaǵan? Biz ólimge kinálilerdiń óz jazasyn alǵanyn qalaımyz. Biraq bular qylmysty aqyrynda jaýyp tastaı ma dep qorqamyz», – deıdi marqum Estemesovtyń ápkesi.

Alaıda, aýrýhana aýylsharýashylyq bóliminiń meńgerýshisi Árken Úshúrov káriz qudyǵyna túsip, gazdan ýlanyp qaza tapqan eki santehnıktiń qazasyna ózin kináli sanamaıtynyn aıtady. Qazir Árken Úshúrov jumyssyz. Ol byltyr qyrkúıek aıynda óz erkimen jumystan ketýge ótinish jazǵan.  

Usynǵan: Farıza Jomartqyzy