Reseı Belarýs elin Batystyń qushaǵyna ózi tyqpalap berdi. Mundaı pikirdi aıtqan Belarýsıa prezıdenti Aleksandr Lýkashenko. Seısenbi kúni eýropalyq uıymdarmen  ıntegrasıalyq qurylymdar jáne yntymaqtastyqqa qatysty keńeste aıtyldy bul sóz.

"Ýkraınskaıa pravda" basylymynyń habarlaýynsha, Belarýs Reseı tarapynan bolyp jatqan shekteýdiń saldarynan Batyspen seriktestikti nyǵaıtýǵa májbúr.

«Batyspen seriktestiktiń ornaýy bizdiń basty seriktesimiz – Reseı Federasıasynyń kóńiline jaqpaı qalypty. Tipti ashýy qara qazandaı eken. Nesine bulqan-talqan bolyp jatyrsyzdar? Bizdiń ónimdi naryqqa jibermeıdi, aramtamaq deıdi, kez kelgen múmkindikti paıdalanyp, qysym jasaıdy, basyp-janshýǵa daıyn turady, keýdelerinen ıteredi. Endi ne isteımiz? Jer astyna jasyrynyp alyp, shyqpaı otyrǵanymyz kerek pe?», - dedi ashýǵa mingen Lýkashenko.

Belarýsıa úshin bir esik jabylsa, ol ekinshi esikti izdeýge májbúr bolady. Osylaı degen el prezıdenti Reseıden Belarýstiń mundaı qadamdaryn aıyptamaýdy talap etti.

«Biz eshqaıda burylmaımyz, burylatyn jer de joq. Basymyzdy aınaldyrsaq bolǵany, sebebi biz jaǵdaıdyń ortalyǵynda – Eýropanyń ortalyǵynda ornalasqanbyz», - dep málimdedi ol.

«Alystan arbalaǵansha, jaqynnan dorbala. Eger Reseımen qarym-qatynasymyz qalypty bolsa, eger Odaqtyq memlekettermen erkin kelisimderge kele alsaq, erkin saýdalassaq, bizdi qorlamasa, baqytty alystan izdep nemiz bar?», - dedi prezıdent ashýly sózinde.

Al eldiń Eýropalyq Odaqpen kelisimge kelýindegi alǵashqy mindet – vızalyq rejımdi jeńildetý. Onyń ústine EO-men tyǵyz qarym-qatynastaǵy Reseıge mynadaı renishin taǵy bildirdi.

«Reseı Eýropalyq Odaqpen, AQSH-pen, NATO-men tyǵyz qarym-qatynasta. Biz osy úshin Reseıdi aıyptadyq pa? Bul kelisimder tek óz paıdamyz úshin jasaldy. Eshkimge bóget keltirip otyrǵan joqpyz, dushpandarymyzdyń qataryna qosyp qoımadyq. Reseıdiń de áreketi osyndaı bolsa ıgi. Sony sózben emes, ispen kórsetse tipti jaqsy bolar edi», - dedi Lýkashenko.

Lýkashenkonyń aıtýynsha, Belarýs ekinshi iri seriktesi EýroOdaqpen ońtaıly dıalog ornatyp keledi. Investısıalar ósip, syrtqy saýda ulǵaıdy, baılanystar keńeıdi.

Al reseılik BAQ Lýkashenkonyń bul áreketin kórealmaýshylyq, ishtarlyq saldarynan týǵan dep boljady.

Gúlim Jaqan