Jyl saıyn 24 naýryzda álemde Dúnıejúzilik týberkýlezge qarsy kúres kúni atap ótiledi. Dúnıejúzilik densaýlyq saqtaý uıymynyń muryndyq bolýymen ótetin dástúrli shara bıyl «Týberkýlezdi joıý, syrqattardy TOLYQ EMDEP JAZÝ» degen uranmen ótpek dep habarlaıdy Qamshy.kz aqparat agenttigi.

Qazaqstanda týberkýlez tegin emdeledi. Týberkýlezdiń aldyn alý, anyqtaý men emdeý kepildendirilgen tegin medısınalyq kómek sheńberinde júrgiziledi. 2019 jyly atalǵan dertke shaldyqqan azamattardy emdeý men áleýmettik kómek kórsetýge memlekettik búdjetten Astana qalasy boıynsha 1,954 mlrd teńge bólindi.

Resmı statısıkaǵa súıensek, 2018 jyly Astanada 867 pasıent dıspanserlik esepte turǵan týberkýlezdiń belsendi túrimen aýyratyndar bolatyn. 2018 jyly 523 adam pasıentter qataryna jańadan qosylǵandar. Pasıentterdiń basym bóligi Túrkistan oblysy men Shymkent qalasynda (3604), Almaty oblysynda (3311), Shyǵys Qazaqstan (2860) jáne Qyzylorda (2495) oblystarynda turady.

Der kezinde anyqtalyp, tıisti em-dom jasalsa týberkýlezdi tolyq emdep jazýǵa bolady. Sondyqtan aýrýdy asqyndyrmaı, emdeýshi dárigerdiń nusqaýlaryn oryndaýdyń mańyzy zor. Dúnıejúzilik densaýlyq saqtaý uıymynyń málimetinshe, 2000 jáne 2016 jyldar aralyǵynda týberkýlezdi erte anyqtaý men emdeý nátıjesinde álem dárigerleri 53 mıllıonnan astam adamnyń ómirin saqtap qalǵan.

Týberkýlezdiń qarapaıym túrin emdeýge shamamen 6 aıǵa jýyq ýaqyt ketedi. Qazaqstanda bul aýrý ıntegrasıalanǵan baqylaý strategıasy boıynsha emdeledi. Baqylaýdyń bul túri týberkýlezdiń jabyq túrimen aýyratyn naýqastardyń emhanada ambýlatorlyq em qabyldaýyna múmkindik
beredi.

Týberkýlezdiń aldyn alý úshin emhanada turaqty tekserýden ótip turý qajet. Tekserý men ekpe egý kepildendirilgen medısınalyq kómek sheńberinde tegin júrgiziledi:

• BSJ vaksınasy – týǵannan keıin birneshe kún ishinde salynady;

• 7 men 14 jas aralyǵynda BSJ-dan revaksınasıa jasalady (ekpe ekpes buryn – Mantý synamasyn salyp, organızmniń reaksıasyn tekseredi);

• flúorografıalyq skrınıng (eresekterge, jyl saıyn);

• kórsetilimder bolsa: rentgenografıa jasaý.

Usynǵan: Farıza Jomartqyzy