Májilis depýtaty Baqytbek Smaǵul Nur-Sultan ataýyna qatysty qazir kópti alańdatyp otyrǵan máseleni kóterip, elimizdiń basty kósheleri men dańǵyldarynyń ataýyn asyǵys ózgertýge narazy ekenin jetkizdi. Bul týraly ol Demokratıalyq kúshterdiń "Qazaqstan-2050" jalpyulttyq koalısıasynyń otyrysynda aıtty, dep habarlaıdy Qamshy.kz aqparat agenttigi sputniknews.kz saıtynyń deregin negizge alyp. 

Onyń pikirinshe, kóshe ataýlaryn asyǵys aýystyrý abyroı alyp bermeıdi.

"Keıbir óńirlerdiń asyǵystyqqa salynyp, tarıh tórinen oryn alǵan handarymyz, tóbe bılerimiz, uly aqynymyz atymen atalǵan, tipti táý eter kıelerimizdiń biri – Táýelsizdik uǵymy ulyqtalǵan oblystar ortalyǵyndaǵy basty kósheler men dańǵyldardyń ataýyn asyǵys ózgertýi jergilikti jurtshylyqtyń narazylyǵyn týǵyzady. Bul abyroıly is emes. Jarastyǵymyzdy jaramsaqtyqpen buzbaıyq!", - deıdi depýtat.

Depýtat el ulyqtaǵan attary bar eski kóshelerge jaýdaı tıe bermeı, ár oblys ortalyǵynda zamanaýı stılde jańa kósheler salýdy usynady.

"Ortalyq kóshe, ne dańǵyldy jańadan jobalap turǵyzyp, soǵan Elbasynyń atyn bergen jón. Ár oblys ortalyǵyndaǵy jasyl tehnologıalarǵa qurylǵan, qazirgi álemdegi qala salýdyń eń ozyq tájirıbeleri endirilgen dál osy jańa dańǵyldar ózge kóne kóshelerge jańǵyrýdyń úlgisin kórsetip, olardy jańa deńgeılerge jeteleıtin bolady", - deıdi ol.

Osyndaı usynysty ortaǵa tastaǵan depýtat qalyń qaýymdy jaq-jaq bop taıtalaspaýǵa shaqyrdy.

".. Biz, qazaqstandyqtar, eń aldymen, qazaqtar, dál qazir ekige jarylyp, bir-birimizdi qarsylas kórip, jaq-jaq bolyp taıtalaspaýymyz kerek.

Qala ataýyn ózgertý úshin ǵana qazaqtar ózara qyrǵı-qabaq bolyp, qarsylassa, muny erteń bolashaq urpaq túsinbeıdi. Tekke dosqa kúlki, dushpanǵa taba bolmaıyq",- dedi ol.

Aıtýynsha, qalanyń Astana atalýy da kezinde qulaqqa oǵash estildi. "Nur-Sultan" ataýy qazir tosyn kóringenimen, synala, syrlana kele, áldeneshe urpaqtyń sana sezimin aralap, aqyry kóptiń kókeıine qonaqtary sózsiz.

"Sonymen birge, qazaq tilinde astana sózi qalatynyn da umytpaǵan jón, olaı bolsa, "jan-júregim astana", "qazaq eliniń astanasy", "astanalyqtar" sózderi sınonım retinde ary qaraı da qoldanysta júre beredi. Astana sóziniń orys tilinde joıylatynyna qamyqqandarǵa: "Memlekettik tildi úırenińizder. Sonda astana sózin aýyzeki tilde ary qaraı da paıdalana beresizder"" degen jón", - dedi ol.

Aıta keteıik, Qazaqstan Prezıdenti Qasym-Jomart Toqaev Astana ataýyn Nur-Sultan dep ózgertý týraly jarlyqqa qol qoıdy. Budan keıin elimizdiń keıbir óńirleri basty kóshelerge Elbasynyń atyn bergenin jarıalaı bastaǵan edi.