Djordj Stınnı – AQSH-ta ólim jazasyna kesilgen eń jas «qylmysker». Iá,  XX ǵasyrda 14 jastaǵy bozbala «qylmysker» atandy, eshqandaı tergeýsiz, dálelsiz, kýágersiz, tipti zańsyz...

Sot zalynda Dordj qolyna İnjil ustap turyp, kinásiz ekenin dáleldemek boldy. Alaıda túk shyqpady. Sebebi sotqa qatysýshylar da, sot tóreshileri de, advokattar da aq násildi boldy. Sot otyrysy eki saǵatqa sozyldy, al úkim 10 mınýtta kesildi. Kámelet jasqa tolmaǵan bala eki qyzdyń ólimine kináli dep tanyldy.

11 jastaǵy Bettı men 7 jastaǵy Merıdiń óli deneleri Djordj turatyn úıdiń mańynan tabylǵan edi. Eki qyzdy bázbireý zorlap, óltirip, denelerin shirkeý mańyndaǵy shirkeýge laqtyryp ketken. Djordjyń ata-anasyna balalaryna jaqyndatpaq túgili, túrmede de kerekti dúnıelerin berip jiberýge tyıym saldy. Aqyr sońynda bıliktiń buıryǵymen qaladan da qýyldy.

Ólim jazasyna kesilgenge deıin bala 81 kúnin ata-anasynan jyraqta, jalǵyz ózi ótkizdi. Onyń túsiniktemelerin, aqtalýǵa árekettengen sózderin aq násildiler ǵana tyńdady. Tipti advokaty da balaǵa jolaı almady. Al sotta balanyń kinásiz ekenin dáleldemek bolǵan qujattar negizsiz nemese qate dep tanyldy. Tipti arhıvterde balanyń ólim jazasyna kesilgeni jaıly bir túıir qaǵaz ǵana saqtalypty. Onyń ózi zańdastyrylmaǵan.

1944 jyldyń 16 shildesinde 14 jastaǵy bozbala Kolýmbıa túrmesinde ólim jazasyna kesildi. Túrme qyzmetkerleri balany qalaı óltirý kerektigin uzaq oılandy. Nátıjesinde, elektrlik ústelge qoldaryn baılap otyrǵyzyp, basynan 5, 380 vóltti ótkizý arqyly ólimge qıdy.

Al 70 jyldan keıin Ońtústik Karolındegi sot Djordjyń kinásiz ekenin dáleldedi.

Alkolý qalasynyń qaq ortasy temir jolmen bólingen. Onyń bir jaǵynda aq násildiler tursa, ekinshi jaǵyn qara násildiler mekendedi. Al qyzdar gúl alý úshin ózge aýdanǵa ótip ketken soń iz-tússiz joǵalǵan. Jergilikti turǵyn sotta qyzdardyń sońǵy ret Stınnımen sóılesip turǵanyn kórip qalǵanyn aıtty. Balanyń kináli ekenin dáleldeıtin jalǵyz sebep – osy.

1988 jyly amerıkalyq jýrnalıs, jazýshy Devıd Staýttyń «Karolın qańqalary» atty kitaby shyqty. Onda Stınnıdiń ómiri beınelengen. 1989 jyly dál osyndaı ataýmen rejıser Djon Ermannyń fılmi ekrannan kórsetile bastady. Djordjyń rólin somdaǵan Kennı Blenk «Eń úzdik akter» ataǵyn jeńip aldy. Stınnıdiń oqıǵasyna qatysty rejıser Charlz Bernettiń «83 kún» atty fılmi de shyqty. Fılmde Stınnıdiń isine qatysty shynaıy qujattar kórsetilgen.

Gúlim Jaqan