Elbasy «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty halyqqa Joldaýynda agroónerkásip keshenin tolyq iske asyrý qajettigin basa aıtqany belgili. Osyǵan oraı búginde Jambyl oblysynda ekpindi jumystar qolǵa alynýda. Ásirese, moıynqumdyqtar keńestik kezeńnen keıin umyt qalǵan egin sharýashylyǵyn qaıta shalqytý úshin aıanbaı ter tógip jatyr.
Jalpy, qazir aýdanda 5000 gektar sýarmaly jer bolsa, sonyń 1000 gektaryna júgeri egilýde. Bul baǵytta alǵashqylardyń biri bolyp Birlik aýylynyń sharýalary jumysty bastap ketken. Aýyldyq okrýgtegi 1300 gektar egistik alqabynyń 350 gektaryna júgeri egilip jatsa, qalǵan alqaptarǵa jońyshqa tuqymy sebilip bolǵan.
- Bizge bıylǵa berilgen meje 350 gektar jerge júgeri tuqymyn egý bolatyn. Osy maqsatta aýdan ákimdiginiń aýyl sharýashylyǵy bólimimen aqyldasa otyryp almatylyq mamandardan «Býdan» júgeri tuqymyn alyp, 1000 gektardaı jerimizdiń 500 gektaryna súdiger kóterip, júgeri egýdemiz. Mundaı aýqymdy sharýany táýelsizidk jyldarynan beri birde-bir sharýashylyq qolǵa alǵan emes. Sondyqtan aýdanǵa ákim bolyp kelgeli eńbek adamdaryna qoldaý bildirip, tyń tirlikti túletip otyrǵan Máden Musaevqa aıtar alǵysymyz sheksiz. Buıyrtsa, bıyl rekordttyq kórsetkishte ónim alamyz degen úmit bar, - deıdi «Qurdastar» sharýa qojalyǵynyń jetekshisi Erkebulan Jubaev.
Budan bólek, Bınazar aýyldyq okrýginde de dala jumystary qyz-qyz qaınaýda. Munda da júgeri sharýashylyǵyna basymdyq berilgen.
-Men jerimdi erterek jyrtyp, júgeri egýdi bastap kettim. Sharýashylyǵyma qarasty 40 gektar alqaptyń barlyǵyna júgeri egýdemin. «Kóktemniń bir kúni – jylǵa azyq» dep beker aıtylmaǵan ǵoı. Sondyqtan árbir kúnimizdi tıimdi paıdalanýdamyz.
Dala jumystaryna tuqymnan da, tehnıkadan da qoldaý bildirgen aýdan ákimi Máden Musaevqa alǵystan basqa aıtarym joq. Oǵan qosa ákimimiz aǵyn sý keletin kanaldarymyzdy da tazartýǵa basymdyq berýde Sondyqtan bıyl dıhandardyń jer ıgerýge degen yntasy joǵary, - deıdi sharýa Qambar Ataev.
Iá, Bınazar aýyldyq okrýgi boıynsha aǵymdaǵy jyly 573 gektar sýarmaly jer aınalymǵa qosylyp otyr. Onyń 150 gektaryna júgeri egip otyrǵan olar mol ónim alatyndaryna senimdi. Sondaı-aq okrýg ákimi Baǵdat Naýryzbaev ta «Jer-anany baptaı bilse, bereri mol» ekenin túsindirip, sharýalardy uǵynysty eńbekke shaqyrýda.
Aýdannyń asyraýshy salasyna serpin berý baǵytynda kúshamandyqtar da kúsh salýda. Munda 387 gektar egindi jer bar bolsa, sonyń 115 gektaryna júgeri, 60 gektaryna jońyshqa men arpa jáne 120 gektaryna tary egilýde. Al bul jumystarmen aýyldaǵy «Kórkem», «Mereı» jáne «Yrys» sharýa qojalyqtary aınalysýda. Sondaı-aq oblys ákimi Asqar Myrzahmetovtiń tikeleı bastamasymen qurylǵan mehanıkalyq jasaq pen Shý aýdanynan jumyldyrylǵan tehnıka da josparly jumysty júıeli atqarýǵa ólsheýsiz úles qosýda.
Baqyt Jalǵas
