Keshe oblys ákimi tóraǵalyǵmen agroónerkásiptiń damýy boıynsha keńeıtilgen otyrys ótti. Aımaq basshysy Eraly Toǵjanov óz sózinde «Aýyl sharýashylyq sektoryn damytý el úkimetiniń aldymyzǵa qoıǵan negizgi tapsyrmalarynyń biri. Kezinde babalarymyzdyń ata kásibi bolǵan egin jáne mal sharýashylyǵyn jaqsylap qolǵa alsaq, kıeli Mańǵystaý jerinde de múmkindik mol. 
Sondyqtan bul salany damytý boıynsha jumystar júıeli túrde júrgizilýi tıis. Ótken jyldan beri óńirdegi 61eldi-mekendi túgel aralap, arnaıy barýdaǵy basty maqsatym aýyldaǵy aǵaıynmen júzdesip, máselesin óz aýyzdarynan estý jáne onyń sheshý joldaryn qarastyrý» dedi. Mańǵystaý oblysy ákimi apparatynyń basshysy Nurlan Tájibaevtyń málimetinshe, 2017-2018 jyldary oblys ákimi tarapynan berilgen tapsyrmalardy oryndaý barysynda 572 shaqyrym sýmen qamtý, 786 shaqyrym gazben qamtý jáne 595,8 km elektr jelileriniń qurylysy, 71 shaqyrymǵa jýyq aýylishilik jol salynyp paıdalanýǵa berildi (2017-46,6 km, 16 aýyl, 2018-24,2 km, 9 aýyl). 
Nátıjesinde 5 aýyl nemese osy aýyldardyń 60 myńnan astam turǵyny sapaly ınjenerlik ınfraqurylymmen qamtyldy. Qazirgi tańda aýyldardyń elektrmen qatylýy – 100%, gazben qatylýy – 99,8%, ortalyqtandyrylǵan aýyz sýmen qatylýy – 69% qamtydy (2018 jyldyń basyna 64%, halyq sanyna shaqqanda - 85%). Aǵymdaǵy jyly jalpy qýaty 418 shaqyrym bolatyn sý jelileri boıynsha 20 jobanyń qurylysy júrgizilýde. 
Osy jobalardy iske qosý arqyly jyl sońynda aýyldardy aýyz sýmen qamtý kórsetkishin 75%-ke jetkizý josparlandy (halyq sanyna shaqqanda - 93%). Oblystyq aýyl sharýashylyǵy basqarmasynyń basshysy Serik Qaldyǵul aımaqtaǵy aýyl sharýashylyq salasy boıynsha baıandady. 2018 jyldyń qańtar-jeltoqsan aıy boıynsha jalpy ónim kólemi – 16,6 mlrd tengeni (onyń ishinde mal sharýashylyǵy – 12,9 mlrd.tg, egin sharýashylyǵy – 2,9 mlrd.tg) NKI – 104,4% (naqty kólem ındeksi) quraǵan.
Al, 2019 jyly aýyl sharýashylyǵynyń jalpy ónim kólemi 18 mlrd teńge naqty ındeks kólemi -104,6% quraıdy dep josparlanýda. Sońǵy derekterge sáıkes, oblystaǵy 4 túlik mal basynyń sany 803 000, qus sany 46000 basqa jetip, aldyńǵy jyldyń kórsetkishimen salystyrǵanda 9,3% artqan. «Jalpy oblysta 2081 sharýa jáne fermer qojalyqtary jáne 59 000 úı sharýashylyqtary tirkelgen. 
Aýyl sharýashylyǵyn damytý jáne sharýa qojalyqtarǵa qarjylyq qoldaý kórsetý maqsatynda «Aýyl sharýashylyǵyn qarjylaı qoldaý qory» AQ arqyly 2018 jyly 233 aýyl sharýashylyǵy sýbektisine 952,5 mln.teńge mólsherinde, «Agrarlyq nesıe korporasıasy» AQ arqyly 117 aýyl sharýashylyǵy sýbektisine 1,45 mlrd.teńge mólsherinde, NýrKapıtal baǵdarlamasy boıynsha 4 aýyl sharýashylyǵy sýbektisine 76 mln.teńge mólsherinde mıkronesıe berildi. 
Sondaı-aq, «MańǵystaýAgroServıs» JSHS arqyly 32 aýyl sharýashylyǵy sýbektisine 114,3 mln.teńge mólsherinde lızıńke (taýarlyq nesıe) berildi. Oblysymyzdyń tabıǵı ereksheligine baılanysty, egin sharýashylyǵyn damytýdaǵy negizgi sheshim - jylyjaı sanyn arttyrý. 2018 jyly óńirdegi jylyjaılardyń jalpy kólemi 24 ga, al, 2019 jyldyń 1 toqsany boıynsha 27,4 ga qurap otyr. Bıyl jalpy jylyjaılar kólemin 31 ga (29%) ulǵaıta otyryp, 2022 jylǵa qaraı bul kórsetkishti 3 esege deıin jetkizý josparlanýda. Al, aýyl sharýashylyǵy ónimderin qaıta óńdeýmen aınalysatyn 29 kásiporyn jumys istep tur» dedi, Serik Qaldyǵul.
Jıyn sońynda oblys ákimi qala jáne aýdan ákimderine oblystyq statısıka mekemesimen birge aýyl sharýashylyǵy salasyndaǵy jumys jasap turǵan sharýa qojalyqtary men kásiporyndardyń naqty sanyn anyqtaýdy, sonymen qatar aýyl sharýashylyǵy maqsatynda paıdalanýǵa berilgen jer ýchaskeleriniń kólemin normatıvke sáıkestendirý sharalaryn alýdy tapsyrdy. Sonymen qatar óńirdegi agroónerkásipti keshendi túrde damytý úshin sala mamandarymen birlese otyryp, usynys ázirleýge shaqyrdy.
