Búgin Nur-Sultan qalasynda Mańǵystaý oblysynyń ákimdigi jáne L.N.Gýmılev atyndaǵy Eýrazıa ulttyq ýnıversıtetiniń uıymdastyryýymen «Serikbol Qondybaı muralaryndaǵy arǵyqazaq mıfologıasy jáne Uly Dala órkenıeti» atty II halyqaralyq ǵylymı-teorıalyq konferensıa ótti.
Konferensıa, dúnıejúzilik mıfologıalyq mektepterdiń teorıalyq negizderi jáne ıdeıalaryn, taqyryptary men mysaldaryn salystyra zerttep rekonstrýksıalaý negizinde «Arǵyqazaq (deı-túrki) mıfologıasynyń» negizin qalaǵan, jaratylystaný jáne gýmanıtarlyq ǵylymdar salasyndaǵy demokratıalyq oı-tolǵaýlar men jańa tujyrymdar usynǵan mıfolog-ǵalym Serikbol Qondybaıdyń shyǵarmashylyǵyna arnaldy. Konferensıaǵa respýblıkamyzdyń ataqty ǵalymdary men qoǵam qaıratkerleri, Túrkıa, Reseı, AQSH memleketterinen mıfologıa, fılosofıa, tarıh, etnologıa, arheologıa, órkenıet taný salalarynyń ǵalymdary men mýzeı zertteýshiler ortalyǵynyń arnaıy shaqyrylǵan 200 ústinde qonaqtar men ǵylymı orta qatysty. 
Konferensıa barysy - «Kúntekti qaharmen» derekti fılmi, «Qazaqstan» TRK «Balapan» arnasy daıyndaǵan «Aıdar» jáne «Qońyrqaz» anımasıalyq múltfılminiń kórsetiliminen bastalyp, S.Qondybaı shyǵarmalary boıynsha dızaıner Tárbıe Aıdynbaevanyń «Mıftik keıipkerler sherýi» atty defılesiniń tusaýkeserine ulasty. Jınalǵan qaýym atalǵan eki kórsetilimge dán rıza bolyp, alǵan áserlerin ovasıamen bildirdi. Sóz basyn oblys basshysy Eraly Toǵjanovtyń arnaıy quttyqtaýyn jetkizip, konferensıa qatysýshylaryna sáttilik tilegen oblystyq ardagerler tóraǵasy Tóletov Serikbaı Qudaıbergenuly bastady. Konferensıa tizginin Eýrazıa Ulttyq ýnıversıtetiniń prorektory, QǴA akademıgi Dıhan Qamzabekuly ustady. Ǵylymı konferensıa jumysy kelesi baǵyttardy qamtydy:
- Serikbol Qondybaıdyń eńbekteri jáne mıfologıa qubylysy;
- Uly dala qundylyqtary jáne tanym sabaqtastyǵy.
Sheteldik ǵalymdar arasynda álemdik deńgeıdegi ǵalymdar Túrkıe eliniń Egeı ýnıversıtetiniń profesory Mustafa ÓNER, RF, Chývash respýblıkasynyń memlekettik ýnıversıtetiniń profesory, fılologıa ǵylymdarynyń doktory, álemdik túrkitanýshylar asosıasıasynyń tóralqa múshesi Nıkoloaı EGOROV, RF Bashqurtstan Respýblıkasynyń Ǵylym akademıasy Ýfa federaldyq zertteý ortalyǵy tarıh, til jáne ádebıet ınstıtýtynyń profesory, fılologıa ǵylymdarynyń doktory Fırdaýs Hısamıtdınova jáne t.b. qatysty. Solardyń biri Vıskonsın-Madıson ýnıversıtetiniń profesory jáne Nazarbaev ýnıversıteti túrkitaný jáne qazaq tili kafedrasynyń jetekshisi, PhD (AQSH) Iýlaı Shamıloglý baıandama jasap, Nazarbaev ýnıversıtetindegi «Qazaq mıfologıasy» ashylyp, Serikbol Qondybaı shyǵarmalary negizge alynyp oqytylatynyn aıtty. «Meni qýantatyny Serikboldyń shyǵarmalaryna den qoıǵan áli de bizge belgili emes jas ǵalymdardyń ósip kele jatqandyǵy. Eýrazıa ulttyq ýnıversıtetiniń bazasynda bar Serikbol ilimin álemdik ǵylymı aınalymǵa engizýge tolyq múmkindiktiń barlyǵy. Endigi maqsat qazaq mıfologıa týraly eńbekterdiń shetel tilderine aýdarylyp, ulttar men halyqtar mádenıetin jaqyndastyryp nasıhattaý» - dedi ǵalymnyń apasy Balsulý Qondybaı. Konferensıanyń jalǵasy seksıalyq otyrysqa ulasyp, ǵylmı pikirtalas túrinde ótip, kelgender mıflogıanyń qazirgi tańdaǵy kókeıkesti máselelerin qyzý talqylady. Otyrys sońynda «Serikbol Qondybaı muralaryndaǵy arǵyqazaq mıfologıasy jáne Uly Dala órkenıeti» atty II halyqaralyq ǵylymı-teorıalyq konferensıanyń qorytyndysy boıynsha Qarar qabyldandy.
