Qazaqstanda bekire tuqymdas balyqtar úshin genetıkalyq pasporttar jasaqtalyp jatyr. Bundaı jumystar birneshe jyl júrgizilýde. Negizgi maqsaty: bekire tuqymdastardyń mıgrasıalyq joldaryn zertteý, sondaı-aq, tabıǵı jáne jasandy popýlásıa deńgeıin anyqtaý.

- Árbir ustalǵan tuqym berýshi balyqqa jáne jas balyqqa mamandar genetıkalyq pasport jasaıdy. Sonyń arqasynda keıinirek, balyqtyń qaıdan kelgenin, «ata-anasy» kim ekenin, qaı zaýyttan shyqqanyn nemese tabıǵı jolmen paıda bolǵanyn anyqtaı alamyz. Sóıtip, árbir eldiń, árbir zaýyttyń bekire tuqymdastardy qalpyna keltirý úderisine qosqan úlesi de belgili bolady,-deıdi «Balyq sharýashylyǵynyń ǵylymı-óndiristik ortalyǵy» JSHS-niń Atyraý fılıalynyń dırektory Erbolat Qadımov.
​E.Qadımovtyń aıtýynsha, shabaqtardyń ómirsheńdigi týraly naqty aqparattyń bolmaýy – bekire zaýyttary bar Kaspıı mańy memleketteri úshin ortaq problema. Qazir synalyp jatqan gendik – molekýlárlyq taldaý ádistemesi bolashaqta jasandy jáne tabıǵı popýlásıa arasyndaǵy aıyrmashylyqty ajyratyp alýǵa múmkindik beredi.
​Jergilikti eki bekire zaýyty 20 jylda bekire, qortpa, shoqyr sıaqty balyqtardyń júz mıllıonnan astam shabaǵyn teńizge jibergen eken. Eger, qortpa 17-18 jasta jynystyq turǵydan eresek balyqqa aınalatynyn eskersek, kezindegi shabaqtardyń qazir ýyldyryq shashýǵa shyǵýy ábden múmkin.