Jambyl óńirinde densaýlyq saqtaý salasy ólkege Keńes úkimetiniń ornaýymen kásibılene túsken. Óńir turǵyndaryna sapaly medısınalyq qyzmetti uıymdastyrý isiniń basynda revolúsıoner-feldsherler turdy. Sonyń biri áskerı feldsher Stepen Hmelevkıı bolatyn, dep jazady Qamshy.kz aqparat agenttigi. 

Qazan tóńkerisinen soń Áýlıeata ýezinde Keńes úkimeti ornady. Óńirge túrli sala mamandarymen birge áskerı feldsherler de kelip, mundaǵy densaýlyq saqtaý qyzmetin uıymdastyrýǵa atsalysqan. Dál osy qatardan tabylǵan áskerı feldsher Stepen Hmelevskıı 1884 jyly Reseıdiń Odessa qalasynda dúnıe esigin ashqan. 18 jasynda medısınalyq kolejdi támamdaǵan Hmelevskıı erikti túrde Túrkistan ólkesindegi obaǵa qarsy medısınalyq brıgada sapyn tolyqtyrǵan. Arada 10 jyl ótken soń eldegi qoǵamdyq saıası ómirdiń aǵysymen Hmelevskıı Áýlıeata shaharyndaǵy áskerı garnızonda medısınalyq qyzmetti uıymdastyrýǵa tartylady. Munda ol biliktiligimen joǵary uıymdastyrýshylyq qabiletimen basshylardyń kózine túsedi. Jas dáriger patshalyq orys ımperıasynyń ıdeıalaryna qarsy bas kóterip, Qazaq revolúsıasyna qoldaý bildiredi. Sóıte júrip jergilikti jerdegi saıası qyzmetke de aralasady. Ol jas revolúsıoner Turar Rysqulovtan qoldaý taýyp Áýlıeata ýezik atqarý komıtetiniń tóraǵasy qyzmetine deıin kóteriledi . Keıinnen ýezik densaýlyq saqtaý basqarmasyna jetekshilik etip, óńirdegi densaýlyq saqtaý isiniń jumysyn júıelendirýge aıanbaı eńbek etedi. Stepan Hmelevskıı densaýlyq saqtaý isine basshylyq jasap turǵan tusta salada birqatar ilgerileýshilikter bolǵanymen sapaly medısınalyq qyzmettiń qoljetimdiligin arttyrýda aýrýhanalar men dárihana ǵımarattarynyń tapshylyǵy, bilikti mamandardyń jetispeýshiligi óz áserin tıgizdi. Osy tusta Áýlıeata alǵashqy áıelder ambýlatorıasy ashyldy. Bul mekeme ana men bala ólimin azaıtý, ana men bala kútimin saqtaý isine aıryqsha úles qosty. Aýyldyq jerlerde densaýlyqty kútip-baptaý isine nasıhattaý «Qyzyl kıiz úılerdiń» enshisine tıdi.

Aýmaly-tókpeli zamanda óńirdegi eń kúrdeli ári qıyn salaǵa jetekshilik jasaǵan Stepan Hmelevskıı 1950 Taraz qalasynda dúnıe saldy. Tarazdyqtar oblys medısınasynyń damýyna zor eńbek sińirgen mamannyń qurmetine kóshe ataýyn berdi.