Ál-Farabı atyndaǵy QazUÝ-de «Adamı mura jáne joǵary tehnologıalar úılesimi negizinde jetilý» atty Halyqaralyq QS World Wide bilim forýmy ótýde, dep habarlaıdy qalalyq ákimdiktiń baspasóz qyzmeti.

Halyqaralyq bilim forýmyna QR Premer-Mınıstriniń orynbasary Berdibek Saparbaev, Almaty ákimi Baqytjan Saǵyntaev, halyqaralyq uıymdardyń, BUU, IýNESKO-nyń ókilderi, álemge tanymal ǵalymdar, akademıalyq orta kóshbasshylary, álemniń barlyq kontınentterindegi 40 eldiń joǵary bilim salasynyń sarapshylary qatysyp, joǵary oqý oryndarynyń tanymaldyǵyn arttyrý, jahandyq adamı kapıtaldy qalyptastyrýda olardyń róli máselelerin talqylaıtyn bolady.

Forým jumysyn ashqan Berdibek Saparbaev Úkimet basshysy Asqar Mamınniń atynan onyń quttyqtaý sózin oqyp berdi.

Hatta «BUU-nyń «Akademıalyq yqpal» baǵdarlamasyn turaqty damytý jónindegi Jahandyq Hab bolyp tabylatyn ál-Farabı atyndaǵy Qazaq Ulttyq Ýnıversıtetiniń qabyrǵasynda búgingi samıttiń ótip jatqandyǵy tereń sımvolıkalyq mańyzǵa ıe. Búgingi kúni elimiz bilim men ǵylymnyń básekege qabilettiligin arttyrý mindetin sheshý ústinde. Ýnıversıtetterge akademıalyq derbestik berilgen. Bul sharalardyń barlyǵy ýnıversıtetterdiń ǵylym-bilim, tehnologıalyq, jáne gýmanıtarlyq keńistikterdiń evolúsıalyq prosesterine yqpal etýin kúsheıtýge baǵyttalǵan» delingen.

Ýnıversıtetterdiń jahandyq samıti aıasynda joǵary deńgeıdegi birqatar mańyzdy sharalar ótedi, olar: QS World Wide búkilálemdik konferensıa jáne kórme; Álemniń 130-dan astam joǵary oqý oryndaryn biriktiretin Jibek joly (SUN) ýnıversıtetteri Alánsy Bas Assambleıasynyń, túrli kontınentterdiń jetekshi oqý oryndary engen áleýmettik-jaýapkershilik mánge (USRN) ýnıversıtetterdiń Work Shop dúnıejúzilik júıesiniń keńesteri.

«Halyqaralyq QS WorldWide bilim forýmynyń alǵash ret Orta Azıada, onyń ishinde bizdiń kún sáýleli qalamyzda ótýiniń sımvolıkalyq máni bar. Óıtkeni dál osy qalada elimizdiń joǵary mektebi quryldy jáne oıdaǵydaı damý ústinde. Elimizdiń árbir úshinshi stýdenti Almatyda bilim alýda. Qazaqstandyq joǵary oqý oryndary osydan 15 jyl buryn QS World University Rankings-te ózderin kórsete bildi. Ol kezde Qazaqstan atynan bir ǵana ýnıversıtet qatysqan edi. Sodan keıingi jyldary biz ýaqytty tekke ótkizbedik, qysqa kezeń ishinde bizdiń ýnıversıtetter alǵa sýyrylyp shyqty. 2019 jyldyń ózinde bizdiń 10 joǵarǵy oqý oryndarymyz reıtıńke endi, olardyń 6-y Almatyda jumys jasaıdy», – dedi konferensıanyń resmı bóliminde Almaty ákimi B. Saǵyntaev.

Ol óziniń sózinde forýmnyń Qazaqstannyń joǵary oqý oryndarynyń álemniń jetekshi ýnıversıtetterimen tikeleı baılanys ornatýyn talqylaýǵa, Qazaqstannyń joǵary oqý oryndarynyń tanymaldyǵy men básekege qabilettiligin arttyrýǵa yqpal etetinin aıtty.

Aıta keterligi, dál osy kúni ál-Farabı atyndaǵy QazUÝ-niń qabyrǵasynda «Turaqty damýdy júzege asyrýdaǵy jastardyń róli-2030» atty jahandyq kongres ótýde, ony uıymdastyrýshy QR Tuńǵysh Prezıdenti – Elbasynyń Qory, QazUÝ jáne G-Global halyqaralyq Hatshylyǵy.