Áýlıeadadaǵy mektep olımpıadalaryn jáne mektepten tys is-sharalardy ótkizetin oblystyq ortalyqta «Óz ólkeńniń tarıhyn bilesiń be?» atty baıqaý ótti.

Jambyl oblysy ákimdigi bilim basqarmasynyń uıytqy bolýymen ótken shara «Rýhanı jańǵyrý» baǵdarlamasy aıasynda uıymdastyryldy. Básekege 8-10-synyp oqýshylary arasynda aýdandyq, qalalyq baıqaýlardyń jeńimpazdary qatysyp, ózara oı jarystyrdy. Jıynnyń ashylý saltanatynda oblystyq bilim basqarmasyna qarasty oblystyq oqý-ádistemelik kabıneti basshysynyń orynbasary Bıgeldi Tájibaev sharanyń maqsaty oqýshylardyń týǵan ólke tarıhyn bilýge degen tanymdyq qyzyǵýshylyqtaryn arttyrý, zertteýshilikke yntalandyrý ekendigin jetkizip, qatysýshylarǵa sáttilik tiledi.

– Qazaqstannyń damýynda, onyń rýhanı nyǵaıýynda Elbasy Nursultan Nazarbaevtyń «Bolashaqqa baǵdar: rýhanı jańǵyrý» atty baǵdarlamalyq maqalasynda kórsetilgen «Rýhanı jańǵyrý» baǵdarlamasyn iske asyrý úlken mańyzǵa ıe. Baǵdarlamanyń «Qazaqstannyń kıeli jerleri» baǵytynda «mádenı-geografıalyq beldeý» týraly, osy beldeýdiń róli men oǵan enetin oryndar týraly, jat ıdeologıalardyń áserinen qorǵanys retinde, ulttyq maqtanysh retinde árbir qazaqstandyq bilýi úshin oqý-aǵartý daıyndyǵyn júrgizý qajettigi týraly aıtylǵan. Osy oraıda oblys ákiminiń hattamalyq tapsyrmasy da bar, – dedi B.Tájibaev.

Munan soń bilimderimen oza shaýyp, kóptiń ishinen iriktelip kelgen oqýshylar baıqaýdyń alǵashqy «Óz ólkeńniń tarıhyn bilesiń be?» atty kezeńin bastap ketti. Onda qatysýshylarǵa óńirdiń tarıhy týraly test tapsyrmalary berildi. Sondaı-aq sharanyń qorytyndy «Týǵan ólke – tunǵan tarıh» atty ekinshi bóliminde oqýshylar zertteý jumystaryn vıdeoprezentasıa arqyly jetkizdi. Óz kezeginde qatysýshylardyń bilimine M.H.Dýlatı atyndaǵy TarMÝ «Qazaqstan tarıhy» kafedrasynyń dosenti Seıdahan Baqtorazov pen TarMPÝ «Qazaqstan tarıhy» kafedrasynyń aǵa oqytýshysy Baǵymkúl Qozykeeva ózindik baǵalaryn berip otyrdy.

Jalpy baıqaý barysynda oqýshylar oblys aýdandary men Taraz qalasynyń tarıhı-mádenı nysandary, arheologıalyq eskertkishteri, oblys tarıhy, týǵan ólkeden shyqqan tanymaly saıası jáne qoǵam qaıratkerleri, aqyn-jazýshylar, ǵalymdar, sportshylar, tarıhı oqıǵalar jaıly bilimderin kórsetip, ǵylymı izdenis jumystarynyń nátıjesimen bólisti.

Baıqaý nátıjesi boıynsha İ oryndy Taraz qalalyq №30 mektep-gımnazıasynyń 10-synyp oqýshysy Dılára Átirbaeva enshiledi. Jambyl aýdany B.Momyshuly atyndaǵy mektep-gımnazıasynyń 10-synyp oqýshysy Erkemaı Qaırat pen Shý aýdany M.Áýezov atyndaǵy orta mekteptiń 9-synyp oqýshysy Aıajan Nurmahan İİ oryndy ózara bólisti. T.Rysqulov aýdany B.Momyshuly atyndaǵy orta mekteptiń 9-synyp oqýshysy Sabına Bekquly, Sarysý aýdany J.Otarbaev atyndaǵy orta mekteptiń 9-synyp oqýshysy

Aıaýlym Jańabaı jáne Shý aýdany Sh.Ýálıhanov atyndaǵy orta mekteptiń 10-synyp oqýshysy İnjý Muqataı júldeli İİİ orynǵa qol jetkizdi.