Almatydaǵy joldardyń qaýipsizdigin qamtamasyz etý maqsatynda «Sergek» fotovıdeofıksasıa men taldaý jobasy engizilip, 400 aparattyq-baǵdarlamalyq keshen ornatyldy. Atalǵan jobany memlekettik-jekeshelik seriktestik aıasynda Almaty qalasynyń polısıa departamenti jáne qazaqstandyq İT kompanıamen birge «Kórkem Telekom» JSHS júzege asyrýda. Búgingi kúni barlyq qondyrǵylar Almaty qalasynyń polısıa departamentine berilgen.

Almatydaǵy aparattyq-baǵdarlamalyq keshender mynadaı JKO túsirip alady, olar:

-         jyldamdyqty asyrý;

-         baǵdarshamnyń tyıym salǵan dybysyn elemeý;

-         jolaq talabyn buzý, toqtaý jelisinen ótý;

-         qoǵamdyq kólikke bólingen jolaqqa shyǵyp ketý.

Bulardan ózge, «Sergek» júıesi jaıaý júrginshilerdiń rettelmegen ótpeli joldaryn baqylaıdy.

«Ákimshilik aıyppuldar eń sońǵy tıynyna deıin memlekettik búdjetke túsedi. Ózge óńirlerde jol-kólik oqıǵalary azaıdy», – dedi BAQ ókilderiniń suraqtaryna jaýap bergen Almaty qalasy polısıa departamenti ákimshilik polısıa basqarmasynyń bastyǵy Jandos Muratalıev.

Túsken qarajattyń barlyǵy joldaǵy qaýipsizdikti qamtamasyz etý sharalaryna jumsalýda.

J. Muratalıev óziniń sózinde JKO sanynyń artýy saldarynan apat jıi bolatyn jerlerge «Sergek» keshenin ornatý týraly sheshim qabyldanǵanyn aıtty. Munda azamattardyń usynystary da eskerildi. Olardan 30 myńnan astam usynys túsken.

«Sergek» júıesi joldaǵy jaǵdaıdy «jasandy ıntellekt» jáne kompúterlik kórý arqyly taldaıdy. Árbir aparattyq-baǵdarlamalyq keshendegi qysqa jáne jalpy baǵytty sholý kameralary tek qozǵalys bóligin ǵana emes, qaladaǵy qoǵamdyq qaýipsizdikti de baqylaıdy. Jol-kólik qozǵalysy buzylǵan jaǵdaıda málimetter jol qozǵalysy qaýipsizdiginiń avtomatty aqparattyq júıesine beriledi, ákimshilik polısıa ony teksergen soń ǵana tártip buzǵandarǵa aıyppul tóleý úshin jiberiledi.

Buryndary mundaı joba Nur-Sultan qalasynda qolǵa alynǵan edi. «Sergek» jobasyn basqarý boıynsha dırektor Bıbigúl Aıtúkenova jyl ishinde JKO boıynsha adam ólimi deńgeıiniń eki ese qysqarǵanyn aıtty.

Óz kezekterinde saraptama qoǵamdastyǵy men jurtshylyq ókilderi de «Sergek» júıesiniń jumysy mańyzdy ekenin atap ótti.

Táýelsiz Avtomobıl odaǵynyń tóraǵasy Edýard Aleksandrovıch Edokov «Sergekti» engizý álemdik tájirıbege saı ekenin aıtty.

«Sergekterdi» engizý durys ári paıdaly dep esepteımin. Bul qatardaǵy álemdik tájirıbe. Bizderdi, júrgizýshilerdi jol-kólik qozǵalysy kezinde baqylaý, al erejeni buzatyn bolsaq, jazalaý qajet. Qazirgi kezde osy taqyrypqa qatysty kóterligen haıp tolqyny birinshi kezeń ǵana, birtindep barlyǵymyz oǵan úırenetin bolamyz», –  dedi E.Edokov.

Sarapshy kezinde jol qozǵalysy qaýipsizdigin saqtaýda mańyzdy shart – beldikti taǵý týraly erejeni kópshiliktiń jatyrqaı qabyldaǵanyn eske túsirdi.

«Bárimiz úshin paıdaly ári qarapaıym ádis, erejeni buzbaý, bar bolǵany sol ǵana. Erejeni buzbaıtyn bolsań eshkimge, polısıaǵa da, memleketke de tólemeısiń. Óz jolyńmen kete beresiń. Óziń de qaýipsizsiń, ózgeler de qaýipsiz. Mundaı kameralar kóp bolsa, bárimizge paıdaly», –  dep atap ótti Edýard Edokov.

«Qazaqstannyń veloqaýymdastyǵy» qoǵamdyq birlestiginiń ókili Dýman Qapasov «Sergek» kesheniniń kóliktiń barlyq túrlerin júrgizý mádenıetin arttyratynyn, kólik qozǵalysyna qatysýshylardyń barlyǵynyń, ásirese jaıaý júrginshiler men velosıpedshilerdiń qaýipsizdigine oń yqpal etetinin aıtty.