Almatyda jumys isteıtin jastarǵa satyp alý quqyǵynsyz jalǵa beriletin turǵyn úı berý baǵyty boıynsha ótinishter men qujattardy qabyldaý júrýde. Qujattardy 6 naýryzǵa deıin ótkizýge bolady.

Satyp alý quqyǵynsyz 5 jylǵa jalǵa beriletin úılerdiń bul jolǵy leginde Alataý aýdany Aqkent shaǵynaýdanynda eki bólmeli 114 páter tapsyrylmaq. Páterlerdiń jaldaý aqysy 5 myń men 12 myń teńge aralyǵynda.

Ótinishter men qujattar www.almaty-jastary.kz saıty arqyly qabyldanady. Avtorızasıa saıtta elektrondyq sıfrlik qoltańba (ESQ) arqyly júrgiziledi. Ony «Azamattarǵa arnalǵan úkimet» memlekettik korporasıasy» KEAQ-tan (HQKO) alýǵa bolady.

Baǵdarlamaǵa 29 jasqa tolmaǵan, sońǵy eki jylda Almaty qalasynda tirkeýde turǵan, jalaqysy 101 myń teńgeden asatyn, bankte depozıti bar, ótinish tapsyrýshy men jubaıynyń atynda úıi joq azamattar qatysa alady.

Ótinish berýshilerdiń tizimi upaı júıesin (eń kópupaı sany boıynsha) esepke alýmen jasalady. Upaılardyń berilý krıterııleri, sondaı-aq, qajetti qujattar tizimi joǵaryda kórsetilgen saıtta ornalastyrylǵan.