Búgin Senatta «Agroónerkásiptik keshendi damytý máseleleri» jónindegi parlamenttik tyńdaý ótip, joǵary palata spıkeri Darıǵa Nazarbaeva «agrarlyq sektordaǵy jalpy ishki ónimniń úlesi 10 jyl ishinde 5% asqan joq, al sońǵy jyldary turaqty túrde tómendep keledi» dep syn aıtty. Bul týraly Qamshy.kz aqparat agenttigi Azattyq-ruhy.kz deregin negizge alyp habarlaıdy.

Senat tóraǵasynyń pikirinshe «Qazaqstannyń et odaǵy» birlestiginiń tóraǵasy, aýyl sharýashylyǵyn basqarǵan eks-mınıstr Asyljan Mamytbekov jaýap berdi. Ol aýyl sharýashylyǵy salasynda problema bar, biraq ósimdi de joqqa shyǵarýǵa bolmaıdy.

– Sońǵy 10 jylda aýyl sharýashylyǵy salasy toqyraýǵa ushyraǵany jaıly aıtyldy. Bul salada problema joq deı almaımyn. Másele óte kóp, biraq saladaǵy ósim men dınamıkany joqqa shyǵarý durys emes, –dedi eks-mınıstr.

Asyljan Mamytbekov 2019 jyldyń kórsetkishteri áli naqtylanbaǵandyqtan, 2010-2018 jyldardaǵy el ekonomıkasynyń negizgi salalary boıynsha naqty ósim boıynsha birqatar dálel keltirdi.

• Ónerkásip salasy - 224,8 % (qaıta óńdeý boıynsha aýyl sharýashylyǵy salasynyń da úlesi bar);
• Qurylys salasy - 198,7 %;
• Kólik salasy - 168,2 %
• Aýyl sharýashylyǵy - 245,5 %;

2010 jyly jalpy ishki ónim kólemi 1,822 trln teńgeni quraǵan. Al, 2018 jyldyń qorytyndysy boıynsha bul kórsetkish 4,474 trln teńgege jetken. Ósim 245,5%-dy kórsetken jáne bul joǵaryda atalǵan el ekonomıkasynyń negizgi salalarynyń barlyǵynan kóp.

– Aýyl sharýashylyǵy sektoryndaǵy JİÓ úlesi boıynsha Afrıkanyń Gvıneıa-Bısaý (62%), Somalı (65%), Lıberıa(76,9 %) sıaqty kedeı elderi kósh bastap tur. Al, jetekshi agrarlyq derjavalarda agrarlyq sektordaǵy jalpy ishki ónimniń úlesi 2% shamasynda. AQSH-ta - 1,2%, Germanıada - 0,9%, Nıderlandta -1,7%. Bul elderdegi kórsetkish bizdegiden de tómen. Sondyqtan saladaǵy JİÓ úlesi aýyl sharýashylyǵyn damytýdaǵy basty kórsetkish emes, – dep aıtty eks-mınıstr.