Áleýmettik jelide tergeý ızolátorynda qaıtys bolǵan elordalyq belsendi Dýlat Aǵadildiń máıiti túsirilgen vıdeo taraǵan. Búgin atalmysh vıdeoǵa qatysty Bas prokýratýra brıfıń ótkizdi.

Bas prokýrordyń orynbasary Eldos Kelimjanov atalmysh vıdeo Dýlat Aǵadildiń týystarynyń ruqsatynsyz jarıalanǵanyn eskertti. 

– Jelide taraǵan vıdeoda máıitte kógergen daqtar bary týraly aıtylady. Ony dene jaraqaty dep aıtady. Munda onyń paıda bolý sebebin túsindire alatyn mamandar bar. Máıittegi daqtar - bul bıologıalyq ólimniń belgileri. Medısınalyq tilmen aıtqanda, daqtar adamnyń júregi toqtaǵannan keıin keminde bir saǵat ótkennen keıin paıda bolady, – deıdi Nur-Sultan qalasy prokýrorynyń orynbasary Eldos Qelimjanov.

Sondaı-aq Eldos Kelimjanov sot medısınalyq saraptamasyna Dýlat Aǵadildiń advokaty men onyń aǵasy qatysqanyn aıtty. 

– Marqumnyń aǵasy men advokat Azanov saraptama qorytyndysyna shaǵymdanǵan joq. Máıitti saraptaý men zertteý barysy vıdeoǵa túsirildi. Etıka talaptaryna baılanysty jáne týystary ruqsat bermegendikten vıdeony jarıalaı almaımyz. Buǵan deıin saraptamanyń aldyn ala qorytyndysyn aıtqanbyz. Aǵadil júrek qantamyrlarynyń jetispeýshiliginen qaıtys bolǵan, – dedi Kelimjanov.