Parlament Májilisiniń jalpy otyrysynda "Qazaqstan Respýblıkasynyń keıbir zańnamalyq aktilerine kóshi-qon prosesterin retteý máseleleri boıynsha ózgerister men tolyqtyrýlar engizý týraly" zań jobasy ekinshi oqylymda maquldandy, dep habarlaıdy QazAqparat.

Atalǵan zań jobasynyń birinshi oqylymy 2019 jylǵy 11 jeltoqsanda boldy. Talqylaý barysynda depýtattar tarapynan aıtylǵan pikirler eskerile otyryp, zań jobasy odan ári jetildirildi. Zań jobasymen 9 kodekske jáne 21 zańǵa ózgerister men tolyqtyrýlar engizý kózdelip otyr.

– Jaǵymsyzdaý ataýǵa aınalǵan "oralman" sóziniń ornyna, aldaǵy ýaqytta "qandas" ataýy qoldanylatyn bolady. Qandastarymyzǵa elimizde turaqty turýǵa ruqsat alý jáne Qazaqstan azamattyǵyn alý úshin qujattardy bir mezgilde tapsyrý múmkindigin berý qarastyrylyp otyr. Buǵan deıin olar eki ret qujat jınap tapsyrýǵa májbúr edi. Sondaı-aq elimizde 183 kúnnen kem turý jáne ákimshilik quqyqbuzýshylyqtardyń bolýy boıynsha zańnamalyq normalar qoldanylmaıtyn adamdar sanatyna etnıkalyq qazaqtardy qosý kózdelip otyr. Bul túzetýde qandastarymyzdyń Qazaqstan azamattyǵyn alýyn jedeldetýge septigin tıgizedi, – deıdi depýtat Káribaı Musyrman zań jobasy boıynsha baıandama jasaı otyryp.

Sonymen qatar depýtat shetel azamattaryn Qazaqstan aýmaǵynan shyǵarý tártibin jeńildetý qadamyna toqtaldy.

– Depýtattar eshqandaı qujaty joq sheteldik azamattardy elden shyǵarýǵa múmkindik beretin jol júrý qujatyn engizýdi usyndy. Sebebi sottardyń sheshimimen elden shyǵarylýǵa tıisti júzdegen sheteldik eshqandaı jaramdy qujatynyń bolmaýyna baılanysty Qazaqstan aýmaǵynan shyǵarylmaı, polısıanyń qabyldaý oryndarynda memlekettik búdjet esebinen tegin turyp jatyr, – dedi K. Musyrman.