Koronavırýs juqpasynyń aldyn alý úshin, saqtyq sharasyna baılanysty Almaty qalasynyń túrli medısınalyq nysandarynda 490 adam karantınde jatyr. Bul týraly Almaty qalasynyń ákimdigi habarlady. 

Infeksıany juqtyrǵandar Almaty qalasynyń 2 aýrýhanasyna oqshaýlanǵan. 1 «a» sanaty boıynsha karantınge jatqyzylǵan adamdar koronavırýs jappaı taralǵan Iran, QHR, Ońtústik Koreıa jáne Italıa elderinen kelgender.

14 kúnge oqshaýlanǵan adamdardan qaýipti vırýstyń belgisi anyqtalmaǵan. Qoǵamdyq densaýlyqty saqtaý basqarmasynyń habarlaýynsha, 1 sanattaǵy elderden kelgen tulǵalarǵa  2 juqpaly aýrýlar aýrýhanasy men kópsalaly 4 medısınalyq ortalyqta tósek-oryn qarastyrylǵan.

Basqarmanyń habarlaýynsha, qazirgi ýaqytta aýrýhanaǵa kelýshilerdiń sany kúrt kóbeıgen. 14 kúndik karantınnen bólek, Almatyǵa Ulybrıtanıa, Nıderlandy elderinen kelgen tulǵalar 2-sanat boıynsha medısına qyzmetkerleriniń baqylaýyna alynǵan.

Shetelden kelgen azamattar 10 kún dárigerlermen baılanysta bolyp, jaǵdaıdy habarlap otyrýlary tıis.

– Barlyq kelýshi azamattar osy jaǵdaıǵa birdeı qarap, karantın merzimin ustaýǵa tıis, ony buzǵany úshin ákimshilik aıyppul salynady. Medısına qyzmetkerleri bul adamdardy tappaǵan jaǵdaıda, Kóshi-qon qyzmetine, shetel azamattaryn tappaǵan jaǵdaıda UQK-ge qosymsha habarlaıdy, – dedi Almaty qalasynyń ákimdigi.

Ákimdik indetten saqtaný tek dárigerlerge ǵana emes, turǵyndardyń tikeleı ózderine de baılanysty dep aıtty. Infeksıanyń aldyn alý  úshin mamandar adamdarǵa beti-qolyn jıi sabyndap jýyp, qoldy spırt antıspetıgimen súrtýmen qatar, adam kóp shoǵyrlanǵan jerlerge barmaý kerek ekenin eskertti.

Sondaı-aq karantınge alynǵan adamdar eskertýdi elemeı, qonaqqa barsa ákimshilik jazaǵa tartylady dep atap ótti.