Qyzylordalyq polıseıler tótenshe jaǵdaı rejımin buzǵan tórt kafe ıesin jaýapqa tartty, dep habarlady Polisia.kz .  

Eldegi koronavırýsqa baılanysty túngi reıdte oblys boıynsha 303-ke jýyq kafe-meıramhanaǵa tekserý júrgizildi. Tekserý barysynda 4 kafe ıesi engizilgen tótenshe jaǵdaı rejımine qaramastan óz jumysyn jalǵastyrǵany anyqtaldy. 2 kafe oblys ortalyǵynda, 2 kafe Jańaqorǵan aýdanynda tártipti buzyp juys istegen.

Atalǵan mekemelerdiń ákimshiligine QR ákimshilik quqyq buzýshylyq týraly kodeksiniń 476-babyna saı “Tótenshe jaǵdaı rejımin buzý” ákimshilik hattamalary toltyryldy. Tıisti shara qoldaný úshin jınaqtalǵan qujattar sotqa joldandy.

Polısıa departamentiniń habarlaýynsha, iri saýda nysandarynyń jumys isteý ýaqytyna 10.00 men 18.00, al kıim-keshek satatyn bazarlar úshin 11.00-den 17.00-ge deıin shekteý engizildi. Dámhana men meıramhanalarǵa kelýshilerdiń sany 50 adamnan aspaýy tıis jáne qabyldaý ýaqyty 22.00-ge deıin.

Atalǵan shekteýlerdi oryndamaǵany úshin QR ákimshilik quqyq buzýshylyq týraly kodeksiniń “Tótenshe jaǵdaı rejımin buzý” týraly 476-baby boıynsha 10 AEK aıyppul nemese 15 táýlikke qamaý túrinde jaza kózdelgen. Bılik ókilderiniń zańdy talaptaryna baǵynbaǵany úshin tártip buzýshylarǵa QR Qylmystyq kodeksiniń 379-baby boıynsha 2000 AEK kóleminde aıyppul nemese 2 jylǵa bas bostandyǵynan aıyrý jazasy taǵaıyndalady.

Osyǵan oraı, polısıa qyzmetkerleri quqyq qorǵaý organdarynyń is- áreketterine túsinistikpen qaraýdy jáne tótenshe jaǵdaı kezinde azamattardyń qaýipsizdigi men tártibin qamtamasyz etýge baılanysty qajetti shekteýlerge nazar aýdarýdy suraıdy.