Prezıdenttiń tapsyrmasymen epıdemıaǵa qarsy sharalarǵa jumyldyrylǵan dárigerlerge úsh aı boıy tólenetin ústemaqynyń mólsheri belgili boldy. Bul týraly aqparat jáne qoǵamdyq damý mınıstri Dáýren Abaev málimdedi.

Medısına qyzmetkerleri jumysynyń qaýipine qaraı 3-topqa bólingen.

– Birinshi top – reanımasıa bólimderimen qosa alǵanda, juqpaly aýrýlar stasıonarlarynyń dárigerleri, orta jáne kishi medısına qyzmetkerleri. Barlyǵy 3 284 maman. Olardyń jalaqysyna ústemaqy aıyna 850 myń teńgeni quraıdy. Iaǵnı, ortasha aılyqty qosqanda, olar aıyna shamamen bir mıllıonnyń ústinde alady, – dedi mınıstr.

Ekinshi top – provızorlyq stasıonarlar men jedel járdem qyzmetkerleriniń dárigerleri, orta jáne kishi medısına qyzmetkerleri. Barlyǵy 11 951 maman.

Mınıstrdiń sózinshe, olardyń ústemaqysy aıyna 425 myń teńgeni quraıdy. Iaǵnı ortasha jalaqysyn qosqanda, aıyna shamamen 600 myń teńge alyp turady.

Al úshinshi top –karantındik stasıonarlar dárigerleri, orta jáne kishi medısına qyzmetkerleri, sanıtarlyq dárigerler, jedel járdem júrgizýshileri jáne taǵy basqalary. Barlyǵy 10 994 qyzmetker.

Olar aıyna 212 myń teńge ústemaqy alady. Iaǵnı ortasha aılyǵyn qos eseptegende, aı saıyn 380 myń teńge tólenedi.