Túrkistan oblysynyń polıseıleri sý ortasynda qalyp qoıǵan eki turǵyndy qutqaryp aldy. Bul týraly Polisia.kz habarlady.

Maqtaaral aýdanynda sý basqan aýyldarda óz qyzmetterin atqaryp júrgen polıseılerge, Fırdoýsı aýylyndaǵy ferma aýmaǵynda qalyp ketken adamdar kómek surap habarlasqan.

Habar kelisimen osy aımaqqa bekitilgen ýchaskelik polısıa ınspektory, janyna eriktilerdi alyp, sý basqan Fırdoýsı aýylyna qaıyqpen shuǵyl jetedi. Jan-jaqty muqıat qarap shyǵyp, qalyp ketken turǵyndarǵa izdeý jumystaryn júrgizedi. Nátıjesinde sýdyń ortasynda turǵan eki turǵyndy tapty. Tez arada qaıyqtyń baǵytyn sol jaqqa buryp, 2 adamnyń janyna kelip, olardy qaıyqqa otyrǵyzyp, basqa adamdardyń joqtyǵyna kóz jetkizip, 2 jas jigitti qaýipsiz aımaqqa shyǵardy.

Turǵyndarmen tildesip, surastyrý barysynda olardyń jylqylaryn izdep shyǵyp, aýyldy túgel sý shaıyp ketkennen keıin, keri qaıta almaı qalǵany belgili boldy. Jas jigitter qutqarýshy polıseı men eriktilerge alǵysyn bildirip, jumystaryna tabys tiledi.

– Dúnıe-múlikterińiz úshin osyndaı kózsiz batyrlyqqa barýdyń qajeti joq. Eń bastysy – óz ómirlerińiz. Sý basqan úılerińizge, qora-jaılaryńyzǵa kiremiz dep, óz bastaryńyzdy qaterge tikpeńizder. Bul aýyldarǵa múldem kirýge bolmaıdy, – dep polısıa qyzmetkerleri turǵyndardy sabyrlyqqa shaqyryp, túsindirme jumystaryn júrgizdi.