Aqordaǵa kirmek bolǵan belsendi Janbolat Mamaı men onyń jaqtastaryn polısıa ustap alyp ketti.

Demokratıalyq partıa qurý boıynsha bastamashyl top jetekshisi Janbolat Mamaı pandemıa kezinde halyqtyń turmysy tómendep, áleýmettik jaǵdaıy nasharlaǵanyn aıtyp, osydan birneshe aı buryn birrettik nesıe amnıstıasyn ótkizý bastamasyn kótergen. Bastamany el boıynsha 100 myńǵa jýyq adam qoldaǵan.

Qoǵam belsendisi 4 tamyz saǵat 11:00-de Aqordaǵa 100 myń adamnyń aryzyn tapsyrýǵa baratynyn birneshe kún buryn habarlaǵan. Mamaı men onyń jaqtastary keshe Nur-Sultan qalasyna kelgen.

Búgin Aqorda aldyna jınalǵan qoǵam belsendilerin polısıa qyzmetkerleri karantın bolǵandyqtan Aqordaǵa kirgizbeıtinin málim etip, qujattaryn tapsyryp, ózderine taraýyn surady.

Janbolat Mamaı qujatty jeke ózi Aqordaǵa kirip tapsyratynyn, taramaıtynyn aıtqan soń polısıa olardy qarsylyq tanytty dep ustap, kólikke salyp alyp ketti.

Janbolat Mamaı on jyldan astam ýaqyttan beri bılikti ótkir synap kele jatqan belsendi. Jańaózen oqıǵasynan keıin "áleýmettik arazdyqty qozdyrdy" degen aıyppen tutqyndalǵan. Artynsha "shyn ókinýine baılanysty qylmystyq jaýaptylyqtan bosatý" baby boıynsha bosap shyqqan.

Belsendi keıin de bılikti synaýyn toqtatqan emes. Únemi bılikke qarsy mıtıńilerge shyǵyp, rejımniń aýysýyn talap etip júr.

2019 jyldyń kúzinde Demokratıalyq partıa quratynyn málimdegen. Partıanyń quryltaıyn ótkizgeli jatqanynda jaqtastary tutqyndalyp, quryltaı ornyna bılikke qarsy beıbit mıtıń ótkizgen.

P.S. Qazaqstandaǵy mıtıńilerdiń basym kópshiligi osyndaı senarı boıynsha ótedi. Ulttyq qoǵamdyq senim keńesiniń bastamasymen mıtıńi týraly jańa zań qabyldanǵanyna qaramastan, oıyn beıbit túrde bildirýge shyqqan azamattardy ustaý, qamaý áli toqtaǵan joq. Sondyqtan Qamshy portaly sanaýly saǵattan keıin bolatyn oqıǵanyń osylaı órbıtinin boljap otyr.