Psıhıkalyq saýyqtyrý ortalyǵynyń M. Maqataev kóshesindegi fılıaly pandemıaǵa baılanysty provızorlyq ortalyq bolyp jumys jasaýda. Osydan eki-úsh apta buryn ortalyqqa kúnine 20-25 naýqas túsken bolsa, qazir orta eseppen 8-10 adam túsýde.

Bul týraly onlaın-brıfıng kezinde Psıhıkalyq saýyqtyrý ortalyǵynyń dırektory Sapar Rahmensheev málimdedi.

«Psıhıkalyq saýyqtyrý ortalyǵynyń M. Maqataev kóshesindegi fılıalynda 5 naýryzdan bastap provızorlyq ortalyq qyzmet jasap keledi. Shetelden ushyp kelgen 1800 azamattyń barlyǵy osy ortalyqta boldy. Onyń 152-nen ınfeksıa anyqtalyp, olardy juqpaly aýrýlar aýrýhanasyna aýystyryp otyrdyq. Birinshi shildeden bastap bizdiń ortalyqta 350 tósek provızorlyq tósek jasaldy. Iaǵnı M. Maqataev kóshesindegi ortalyqta 180 tósek bolsa, Á. Kekilbaev kóshesinde 170 tósek provızorlyq kómek kórsetilip jatyr», — dedi spıker.

Provızorlyq ortalyqta bilikti 296 medısına qyzmetkeri jumys jasaıdy.

Olar ókpeniń qabynýynyń ortasha aýyr jáne aýyr dárejesimen, ıaǵnı pnevmonıamen aýyratyn naýqastarǵa barlyq qajetti emdeý sharalaryn júrgizýde.

«Ókpesi qabynǵan naýqastarǵa sapaly medısınalyq kómek kórsetiledi. Naýqastarǵa qabynýǵa qarsy, bakterıaǵa qarsy, sondaı-aq antıkoogýlántti terapıa jáne oksıgenoterapıa qoldanylady. Bul emniń bári Densaýlyq saqtaý mınıstrliginiń bekitken protokoly boıynsha júrgizilýde. Bizdiń ortalyqta 10 reanımasıalyq tósek jáne 6 IVL apparaty bar. Jyl sońyna deıin taǵy 4 IVL apparatyn alamyz dep josparlap otyrmyz», — dedi ortalyq basshysy.

Osy aıdyń basynan atalǵan provızorlyq ortalyqtan 499 adam em alyp, jazylyp shyqqan. Eń este qalatyny, 1933 jyly týylǵan ájeı ókpesiniń 64 paıyzynyń qabynǵan dıagnozymen túsip, emdelip shyqqan.

«1933 jyly týylǵan apamyz bizdiń aýrýhanaǵa túsip, 18 kún jatyp, em qabyldady. Bes kún reanımasıada jatty. KT rentgeninen qaraǵanda ókpesiniń 64 paıyzy qabynǵany anyqtaldy. Ol kisige protokol boıynsha em júrgizilip, on segiz kúnniń ishinde saýyǵyp shyqty», — deıdi Sapar Rahmensheev.

Aıta ketsek, provızorlyq ortalyq ashylǵaly beri jasy 55-ten joǵary 207 naýqas emdelgen. Onyń 152-si jazylyp shyqsa, qalǵandary em qabyldaýda. Búgingi málimetke qarasaq, Maqataev kóshesindegi provızorlyq ortalyqta 103 adam emdelýde, al Á. Kekilbaev kóshesindegi ortalyqta 125 naýqas em alýda. Iaǵnı burynǵydaı emes naýqastar sany azaıǵan ári bos oryndar da bar.

Dırektordyń aıtýynsha pandemıaǵa qaramastan ortalyq óziniń tikeleı mindetterin toqtatqan joq. Iaǵnı dıspanserlik baqylaýda turǵan psıhıkalyq ıa bolmasa narkologıalyq aýytqýlary bar aýrýlardy ambýlatorlyq jáne ortalyqqa jatqyzyp emdeý júrgizilýde. Psıhologıalyq kómek kórsetý de toqtatylǵan joq.