Bilim jáne ǵylym mınıstri Asqat Aımaǵambetov bilim salasyndaǵy birqatar olqylyqty aıtty. Bul týraly ol oqýlyqtardyń sapasy boıynsha ótken onlaın jınalys kezinde málimdedi.

– Memleket basshysynyń tapsyrmasy aıasynda oqýlyqtardy daıyndaý júıesi tolyǵymen ózgerdi. Oqýlyq sapaly bilim alýdyń óte mańyzdy quraly ekeni aıdan anyq. Biz buǵan deıin aıtqanymyzdaı, úlken ózgeristi engizdik. Búkil normatıvtik-quqyqtyq qujattar bekitildi. Ádilet mınıstrliginde tirkeldi. Sondyqtan qazir jańa tártip ornatyldy. Shyǵatyn oqýlyqtardyń sapasy múldem basqasha bolady. Árıne, suraq kóp. Ony bárimiz bilemiz. "Aýrýyn jasyrǵan óledi" degendeı, biz eshteńeni jasyrmaýymyz kerek. Problemaly suraqtar bolsa, olardy tanyp, bilip, olarǵa jaýap berýimiz kerek, – deıdi mınıstr.

Ol óz sózinde oqýlyqtarǵa ortaq talap engizilgenin atap ótti.

– Oqýlyqtardyń formatyna, jiberilgen qatelerge baılanysty da suraqtar kezdesedi. Biz onyń bárin bilemiz. Osy rette oqýlyqqa ortaq talap engizildi. Mysaly, keı formattyń bireýi úlken, bireýi kishkentaı. Tipti muǵalimderdiń aıtýynsha, 1-synyptarǵa arnalǵan ústeldiń ózinde úlken-úlken oqýlyqtardy 2 bala eki jaqtan jumys dápterin jáne oqýlyqty ashqanda, partanyń ózine syımaı jatady. Keıbiri "format degen nege kerek?" dep oılaýy múmkin. Biraq oqýlyqtyń formaty, qarpi, bezendirý máselesi de óte mańyzdy. Sondyqtan balanyń jas ereksheligine, psıhologıalyq turǵydaǵy da máseleler qaralyp, ortaq talap engizilýde.

Oqýlyqtarda buǵan deıin de túrli problemalar boldy. Mysaly, biz oqýlyqtardy daıyndaǵanda, onyń mazmunynda balalarǵa úı jumysyn jasaý úshin ınternettiń siltemesin jiberedi. Keıin «endi osy siltemeni ash ta, úı jumysyn jasa» deıdi. Alaıda, bul tapsyrmany jasaýǵa barlyq balada múmkindik joq. Aýyldaǵy, qaladaǵy, ártúrli jaǵdaıdaǵy balalar bar. Sondyqtan úı jumysyn berip, ony mindettep, tıisti jumysty ınternet arqyly ǵana oqı alatyn úı jumysy bolsa, bala ony qalaı isteıdi?! Osyndaı kemshilikter bolmaýy kerek. Balanyń jasyna, memlekettik til saıasatyna saı ádistemelik turǵyda oqýlyqtar durys bolýy kerek. Elektrondyq oqýlyqtar týraly da másele óte mańyzdy. Ol bárine qoljetimdi bolýy kerek. Sonymen qatar, olardyń tegin bolý suraǵy da basty nazarda.

Biraz máselelerge kóńilimizdi salyp qaraýymyz kerek. Tarıh oqýlyǵy boıynsha tıisti jumys qarastyrylyp jatyr. Qazaqstan tarıhy boıynsha ortaq oqýlyq bolýy kerek. Óıtkeni Táýelsiz Qazaqstannyń tarıhy bolǵandyqtan, oǵan ortaq baǵdarlama boıynsha ortaq oqýlyq bolýy kerek degen usynys bar. Usynysty qarastyryp, tıisti jumysty júrgizip jatyrmyz. Al kórkem ádebıet boıynsha zıatker, daryndy oqýshy qalyptastyramyz desek, balalardyń ádebıetti oqıtyndaı múmkindigi bolýy kerek. Oǵan baýlýymyz kerek. Alaıda, "Bizdiń naryqta balaǵa kerekti ádebıet jetkilikti me?" degen suraq paıda bolady. Onymen qosa, mektep kitaphanalarynyń jaǵdaıy qalaı? Olarǵa kórkem ádebıet kitaptary jetkilikti túrde satyp alynyp otyr ma? Joq pa? Onyń jumys formaty qandaı? Bul suraqtar óte mańyzdy. Kórkem ádebıetti mektepterge alyp berý jaǵdaıy, onyń jetkilikti bolýy, onymen qosa dúnıejúzilik ádebıette tanylǵan ádebıetterdiń qazaq tilindi qoljetimdi bolýy búgingi kúnniń basty suraqtarynyń biri.

Qazaq ádebıeti oqýlyqtarynyń mazmuny, baǵdarlamasy boıynsha da biraz suraq qoıylýda. "Birshama klasık baǵdarlamaǵa enbeı qalǵan" degen suraqtar, ótinish hattar túsip jatyr. Sondyqtan osy másele boıynsha jumys tobyn quryp, tıisti jumysty uıymdastyrylady, – dedi Aımaǵambetov.