Bilim jáne ǵylym mınıstri Asqat Aımaǵambetov bilim salasyndaǵy birqatar olqylyqty aıtty. Bul týraly ol oqýlyqtardyń sapasy boıynsha ótken onlaın jınalys kezinde málimdedi.

– Memleket basshysynyń tapsyrmasy aıasynda oqýlyqtardy daıyndaý júıesi tolyǵymen ózgerdi. Oqýlyq sapaly bilim alýdyń óte mańyzdy quraly ekeni aıdan anyq. Biz buǵan deıin aıtqanymyzdaı, úlken ózgeristi engizdik. Búkil normatıvtik-quqyqtyq qujattar bekitildi. Ádilet mınıstrliginde tirkeldi. Sondyqtan qazir jańa tártip ornatyldy. Budan keıin shyǵatyn oqýlyqtardyń sapasy múldem basqasha bolady. Árıne, suraq kóp. Ony bárimiz bilemiz. "Aýrýyn jasyrǵan óledi" degendeı, biz eshteńeni jasyrmaýymyz kerek. Problemaly máseleler bolsa, olardy tanyp, bilip, olarǵa jaýap berýimiz kerek, – deıdi mınıstr.

Ol óz sózinde oqýlyqtarǵa ortaq talap engizilgenin atap ótti.

– Oqýlyqtardyń formatyna, jiberilgen qatelerge baılanysty da suraqtar týyndaıdy. Biz onyń bárin bilemiz. Oqýlyqqa degen ortaq talap engizildi. Mysaly, keı formattyń bireýi úlken, bireýi kishkentaı. Tipti muǵalimderdiń aıtýynsha, 1-synyptarǵa arnalǵan ústeldiń ózinde úlken-úlken oqýlyqtardy 2 bala eki jaqtan jumys dápterin jáne oqýlyqty ashqanda, ústeldiń ózine syımaı jatady. Keıbiri "format degen nege kerek?" dep oılaýy múmkin. Biraq oqýlyqtyń formaty, qarpi, bezendirý máselesi de óte mańyzdy. Sondyqtan balanyń jas ereksheligine saı, psıhologıalyq turǵydan barlyq máseleni qarap, ortaq talap engizilýde. Bul óte mańyzdy, – dedi Aımaǵambetov.