QR Qutqarýshylar kúnine 25 jyl tolýyna oraı Almatyda eki órt sóndirýshi bóliminde qaıtys bolǵan órt sóndirýshiler men qutqarýshylardyń eskertkishine gúl shoqtary qoıyldy.

Saltanatty shara barlyq epıdemıologıalyq talaptardy saqtaı otyryp júrgizildi.

Tótenshe jaǵdaılar departamentiniń basshysy Serik Áýbákirov bastaǵan garnızon qyzmetkerleri qaza bolǵandardy 1 mınýt únsizdikpen eske aldy.

«Búgingi kún - naǵyz batyrlardyń merekesi. Olar qıyndyqqa tap bolǵan adamdardyń sońǵy úmiti desek te bolady»,- dedi departament basshysy.

Jyl basynan beri órt sóndirýshiler men qutqarýshylar tótenshe jaǵdaı aımaǵynan 150 adamdy qaýipsiz jerge alyp shyqqan. 400 órt sóndirilip, 27 adamnyń ómiri qutqaryldy.

Almaty tarıhynda qalǵan eń úlken órt 1989 jyldyń 20 mamyrynda bolǵan.

Almaty II temir jol stansasynda suıyltylǵan gazdyń eki sısternasyna jıhaz tıelgen temir jol vagondary kelip soǵylǵan edi. Órttiń sońy jarylysqa ulasty.

Órtengen alyp shardyń ishinde 9 órt sóndirýshi ómirimen qosh aıtysty:

• Sháripov Frıd,
• Aqqulov Quralhan,
• Safargalıev Ilshat,
• Nıkýlenko Vladımır,
• Abdranov Islam,
• Qasymov Rasýl,
• Malıkov Mıhaıl,
• Álimtaev Seıil,
• Ysqaqov Erkin.

Órt sóndirýshilerdiń erliginiń arqasynda tilsiz jaý basqa gaz sısternalaryna jaıylmady.

1990 jyly 3 qańtarda Almaty garnızony ishki qyzmet serjanty Balabek Ahmedovtan, 2002 jyly Pavel Goládkınnen aırylyp qaldy.