Almatyda jyl qorytyndysy boıynsha jaqsy jáne qanaǵattanarlyq jaǵdaıdaǵy joldardyń úlesi 80%-ǵa deıin jetetin bolady. Bul týraly qala ákimi Baqytjan Saǵyntaev habarlady.

Almaty ákimi Baqytjan Saǵyntaev Instagram-daǵy óziniń paraqshasynda jol-kólik ınfraqurylymyn salý jáne jóndeý týraly aıtty.

«Ótken jyldaǵydaı jumystyń basym bóligi Jańa Almatyda júrgizilýde. Qalanyń yqshamaýdandaryna aınalǵan burynǵy aýyldardyń turǵyndary joldar men trotýarlardyń joqtyǵy týraly birneshe ret másele kótergen edi. Ony sheshýdi ótken jyly qolǵa aldyq, ortalyqtan alshaq jatqan turǵyn aımaqtaryn ınfraqurylymdyq jaǵynan qaıta jańǵyrtý úshin búdjetti naqtyladyq jáne qarjy bóldik», — dep jazdy B. Saǵyntaev.

Onyń aıtýynsha, taıaýdaǵy eki apta ishinde jol jóndeýshiler aǵymdaǵy jylǵa josparlanǵan jumys aýqymyn aıaqtaýlary tıis. Osylaısha, megapolıstegi jaqsy jáne qanaǵattanarlyq jaǵdaıdaǵy joldardyń úlesi 80%-ǵa deıin jetetin bolady.

Aıta keterligi, 2020 jyly uzyndyǵy 200 shaqyrym bolatyn 283 kóshege ortasha jóndeý jumystary júrgizildi, onyń ishinde shetki yqshamaýdandardaǵy 177 kóshe de jóndeldi. Búgingi kúni 265 kóshe jóndeldi, al uzyndyǵy 18 shaqyrym bolatyn 18 kóshede jóndeý jumystary júrýde.

Budan ózge, aǵymdaǵy jyly uzyndyǵy 47,8 shaqyrym bolatyn 177 kóshede jańa joldar salynýda. Uzyndyǵy 35 shaqyrymdyq 144 kóshedegi joldardyń qurylysy aıaqtaldy. Jyl sońyna deıin uzyndyǵy 12,8 shaqyrym bolatyn 33 kóshege jol salý jumystaryn aıaqtaý josparlanýda.

Ójet, Uljan-1, Uljan-2, Shańyraq-2, Áıgerim-1, Áıgerim-2, Darhan-Baıbesik, Trýdovık (Tomırıs), Alǵabas-AZTM, Jas Qanat, Qarasý, Kók-Qaınar, Aqbulaq, Saıaly-2 yqshamýdandarynda jańa joldar salynýda. Onyń ishinde Áıgerim-1, Áıgerim-2, Shańyraq-2, Uljan-1, Darhan — Baıbesik yqshamaýdandaryndaǵy joldar paıdalanýǵa berildi. Jalpy bularda 122 myńnan astam adam turady.

Sonymen qatar, 2020 jyly Rysqulov dańǵyly — Emsov kóshesi, Seıfýllın dańǵyly — Jansúgirov kóshesi, Buqtyrma kóshesi — Qulja trakti qıylystaryndaǵy úsh jolaıryqtarynyń qurylysy jalǵasýda. Abaı dańǵyly men Saıyn kóshesinde úńgileý jumystary júrýde. Soltústik aınalym kóshesi — Moskvın kóshesiniń soltústigi, Soltústik aınalym kóshesi — Jumabaev kóshesiniń soltústigi, Soltústik aınalym kóshesi — Boraldaı kóshesiniń ońtústigi, Maılın kóshesi — Toqaı kóshesi boılarynda jaıaý júrginshilerdiń jer ústi tórt ótpeli joldarynyń qurylystaryn aıaqtaý josparlanýda.

Eske salsaq, buryndary Almaty ákimi Baqytjan Saǵyntaev jumys sapary barysynda joldardyń, kólik ótkizgishterdiń, jol aıryqtarynyń qurylys alańdaryn aralap, jumys sapasyn qatań saqtaýdy jáne kórsetilgen merzimde paıdalanýǵa berýdi tapsyrǵan bolatyn.