Qyzylordada eki balasyn qaraýsyz qaldyrǵan azamatsha ata-analyq quqyǵynan aıyrylýy múmkin, dep habarlady Polisia.kz.

Saıt málimetinshe, 2021 jyldyń 3 aqpany kúni Qyzylorda qalasyndaǵy bilim berý uıymdarynyń birine 1979 jyly týǵan azamatsha masań kúıde kelip, azamattardyń mazasyn alǵan. Bul derek boıynsha atalǵan azamatshaǵa qatysty ákimshilik quqyq buzýshylyq týraly kodekstiń 440-babymen ("Alkogóldik ishimdikterdi ishý nemese qoǵamdyq oryndarǵa masań kúıde kelý") ákimshilik hattama toltyrylyp, ol ýaqytsha beıimdeý jáne detoksıkasıa ortalyǵyna ornalastyryldy.

"Mektep ákimshiligi men tártip saqshylary azamatshanyń turǵylyqty meken-jaıyn tekserý barysynda joǵaryda kórsetilgen azamatshanyń kámeletke tolmaǵan eki balasynyń qaraýsyz, ári qadaǵalaýsyz qalǵanyn anyqtady. Osyǵan oraı, áıeldiń kámeletke tolmaǵan alty jastaǵy qyzy oblystyq kámeletke tolmaǵandardy beıimdeý ortalyǵyna, bir jarym jastaǵy qyzy kópbeıindi balalar aýrýhanasyna ornalastyryldy. Tekserý barysynda 42 jastaǵy azamatshaǵa qatysty ákimshilik quqyq buzýshylyq jasaǵany úshin úsh ret hattama toltyrylǵandyǵy anyqtaldy" delingen habarlamada.

Qazirgi tańda Qyzylorda qalalyq polısıa basqarmasynyń qyzmetkerleri atalǵan azamatshany ata-analyq quqyǵynan aıyrý nemese shekteý máselesin sheshý úshin qala ákimi janyndaǵy kámeletke tolmaǵandar isteri jáne olardyń quqyqtaryn qorǵaý jónindegi komısıa otyrysyna qujattar jınaqtap jatyr.