Fılologıa ǵylym­darynyń kandıdaty Toq­tar Álibekov ómirden ozdy, dep habarlady Egemen Qazaqstan saıty.

Muhtar Áýezov atyndaǵy Ádebıet jáne óner ınstıtýtynyń tekstolog-ǵalymy Toqtar Álibekov sırek qorlarda saqtalǵan ǵylymı, ádebı shyǵarmalardy qurastyryp, jaryqqa shyǵarǵan.

Búginge deıin ǵalymnyń jeke, ózge de zertteýshilermen qurastyrǵan, jaýapty redaktor retinde jetekshilik etken 150-ge jýyq ǵylymı jınaǵy eldiń barlyq kitaphanalaryndaǵy oqyrmandardyń, joǵary oqý oryndary stýdentteriniń ǵylymı ortanyń ıgiligine aınaldy. Elbasy Nursultan Nazarbaevtyń bastamasymen "Mádenı mura" memlekettik baǵdarlamasy aıasynda qolǵa alynǵan "Babalar sózi" 100 tomdyq serıasyn baspaǵa daıyndap jáne qurastyrýǵa qatysqan ǵalymdar toby jetekshileriniń biri (2010-2013) boldy. Osy ǵalymdardyń  tynymsyz eńbegi men ýaqytpen sanaspaı jumys isteýiniń arqasynda serıaly kitap, merziminen bir jyl buryn jaryqqa shyqty.

Ǵalymnyń  qalam tartqan taqyryptary az emes. Ol  "Abaıtaný" salasyna da mán berip, aqynnyń "Qara sózder" (2007), 1909 jyly Sankt-Peterbýrg qalasynda tuńǵysh ret jaryq kórgen "Qazaq aqyny Ibrahım Qunanbaı uǵylynyń óleńi" jınaqtarynyń óńdelip, qaıta basylýyna, ol týraly "Abaı jáne ulttyq ıdeıa", "Abaı Qunanbaev. Bıblıografıalyq kórsetkishi (1988-2006)",  "Abaı dástúri jáne qazirgi qazaq ádebıeti", "Abaı murasy – qazaqtyń ulttyq qazynasy" syndy zertteý eńbekterin baspaǵa daıyndady.  Sondaı-aq  Abaıdyń ádebı muralaryna qatysty tekstologıalyq zertteýler jazdy.