Bilim jáne ǵylym mınıstri Asqat Aımaǵambetov senat depýtattary birneshe mańyzdy jańa normalardy qamtıtyn zań jobasyn qarastyryp, maquldaǵanyn málimdep, sala mamandary úshin asa mańyzdy eki erekshe norma týraly aıtty.
Alǵashqy norma, pedagogterge qatysty.
– Endi memlekettik bilim berý uıymdaryna pedagogterdi konkýrs arqyly qabyldaý engiziledi. Iaǵnı muǵalimdi jumysqa qabyldaýǵa qatysty sheshim tek dırektorlarǵa táýeldi bolmaıdy. Qazirgi tańda pedagogterdi jumysqa qabyldaý boıynsha qoldanystaǵy júıe ashyqtyq qaǵıdattaryna tolyǵymen saı dep aıtýǵa kelmeıdi, sáıkesinshe sybaılas jemqorlyq kórinisterine jol berilýi múmkin. Máselen, keıbir óńirlerde bir pán boıynsha bir stavkany tórt muǵalimge bólip beredi. Bul óz kezeginde bilim berý sapasyna keri áser etedi. Sondyqtan mundaı faktilerdiń aldyn alý úshin pedagogterdi jumysqa konkýrs arqyly iriktep, barlyǵyna túsinikti ári ortaq ereje boıynsha qabyldaý kózdeldi.
Erejede konkýrstyq irikteýdiń naqty qaǵıdalary bekitiledi. Bul jumys sıfrlyq tehnologıalardyń kómegimen avtomattandyrylady. Sáıkesinshe, pedagogti jumysqa qabyldaý týraly sheshimdi bir ǵana adam emes, kópshilik qabyldaıtyn bolady. Pedagogterdiń kásibıligine jáne barlyq talapqa saı bolýyna den qoıylady, – dedi mınıstr.
Aımaǵambetov ekinshi ózgeris basshylarǵa qatysty ekenin jetkizdi.
– Endi memlekettik bilim berý uıymdarynyń basshylaryn rotasıalaý engiziledi. Rotasıalaý ınstıtýty memlekettik qyzmette, bıznes qurylymdarynda jáne basqa da baǵyttarda engizilgen. Alaıda bilim berý salasynda rotasıalaý tártibin qoldaný múmkin bolmady. Tipti memlekettik uıymdardaǵy basshylardyń basym denimen merzimsiz eńbek sharty jasalǵan, sáıkesinshe kóbi laýazymdyq qyzmetti jyldar boıy atqarady. Degenmen olardyń arasynda uıymdaǵy jumysty jaqsartý úshin bar kúshin, ynta-jigerin salyp eńbek etip jatqan bilikti basshylardyń da bar ekeni jasyryn emes. Tek jyldar boıy bir orynda jumys istese de tıimdiligin joǵaltpaǵandar sanaýly.
Keıbir jaǵdaılarda jumysqa degen yntanyń tómendeýi, motıvasıanyń joǵalýy nemese sol uıymdaǵy basqa mamandardyń da qyzmettik ósýge degen nıeti bolýy – zańdy uǵym. Iaǵnı basshylardyń jyldar boıy bir laýazymda otyrýynyń óz artyqshylyqtary da bar, kemshilikteri de kórinis taýyp jatady.
Jalpy basshylardy oryndarymen aýystyrý úzdik tájirıbeni basqa da uıymdarǵa engizýge yqpal etedi. Árıne, bul turǵyda rotasıalaýdyń naqty tártibi bekitiledi. Rotasıany mınıstrlik ázirlegen qaǵıdalar boıynsha bilim basqarmalary júrgizetin bolady, – dep atap ótti ol óziniń facebook paraqshasynda.
