Májilistiń jalpy otyrysynda depýtat Juldyz Súleımenova mektep oqýshylarynyń sapaly bilim alýyna qoljetimdilikti qamtamasyz etýge qatysty depýtattyq saýal joldady. Depýtat 25 naýryzynda jarıalanǵan Bas memlekettik sanıtar dárigerdiń qaýlysyndaǵy IV toqsanda tómen jáne ortasha táýekel aımaqtaryndaǵy bala sany 300-den úsh myńǵa deıingi oqýshyny qamtıtyn qala jáne aýyl mektepteri aralas formatta oqıtyny týraly pýnktke baılanysy birneshe másele kóterdi.

– Atalǵan másele halyq tyǵyz ornalasqan ońtústik aımaqtaryna ǵana emes, elordaǵa jaqyn ornalasqan orta mektepterge de qatysy bar ekendigine nazaryńyzdy aýdarǵymyz keledi. Sebebi bir ǵana Ilınka aýylynda joba qýattylyǵy 1200 oqýshyǵa arnalǵan orta mektepte búginde 3 myńnan astam bala oqıtyndyǵy eshkimge jasyryn emes. Osy rette, bas sanıtar dárigerdiń synyptardaǵy balalar sanyn 25 adamnan asyrmaı, aralas formatta oqytý jáne "1 synyp – 1 kabınet" qaǵıdatyn saqtaý qaýlysyn oryndaý múldem múmkin emes. Óıtkeni kópshilik orta bilim berý mekemelerinde qalyptasqan jaǵdaıǵa sáıkes bir synypta oqýshy sany 35-ten joǵary mektepter bar. Bul shara óz kezeginde osyndaı synyptardy ekige bólýge, sáıkesinshe muǵalim júktemesin eki ese arttyrýǵa alyp keledi. Oqý jylynyń sońynda muǵalimniń josparlanbaǵan mundaı júktemesine jalaqynyń qandaı qarajattan tólenýi úlken suraq. Mektepterge bul oraıda qosymsha qarajat bólinedi me? Eger bólinbese, muǵalimniń eńbegi, mańdaı ter aqysy qaıdan tólenbek?, – degen depýtat eger synypqa oqýshy sanyn 25-ten kóbeıtýge sheshim qabyldansa, onda mektep dırektorlary óz qaltasynan aıyppul tóleýge májbúr ekenin eske salyp, pandemıa kezinde mektep dırektorlaryna aıyppul tóletý qanshalyqty qısyndy ekenine nazar aýdardy.

– Densaýlyq saqtaý mınıstrligi Taýarlar men kórsetiletin qyzmetterdiń sapasy men qaýipsizdigin baqylaý komıteti 2020 jyldyń 1 qyrkúıeginen 2021 jyldyń 26 naýryzyna deıingi aralyqta karantın talaptaryn saqtaýǵa baılanysty jalpy bilim beretin mektepterde 1787 tekserý, balabaqshalarda 104 tekseris júrgizgen. Osy negizde sanıtarlyq-epıdemıologıalyq normalardy buzǵany úshin mektep dırektorlaryna jalpy sommasy 18 mln 3 23 myń teńge jáne balabaqshalar meńgerýshilerine jalpy sommasy 9 mln 309 myń teńge aıyppul salynǵan. Dırektorlar, meńgerýshiler úshin ákimshilik aıyppul kólemi 230 aılyq eseptik kórsetkishti nemese 638 940 teńgeni quraıdy, – dedi ol.

Osy oraıda, Nur Otan partıasy fraksıasynyń depýtattary birqatar usynystar berdi.

Atap aıtqanda, birinshiden, bas sanıtar dáriger qaýlysynyń talaptaryn, synyptardaǵy balalar sanyn 25 adamnan asyrmaý, muǵalimderge jalaqy tóleý tetikteri tolyqqandy túsindirilýi qajet.

Ekinshiden,  oqýshylardyń bilim sapasyn anyqtaý úshin, jaratylystaný-matematıkalyq jáne qoǵamdyq-gýmanıtarlyq pánderden Ybyraı Altynsarın atyndaǵy Bilim akademıasy, Ulttyq testileý ortalyǵynyń mamandarymen birlesip, oqýshylardyń pándik olqylyqtaryn, ıaǵnı túsinbeı qalǵan kúrdeli taqyryptardy qaıtalap, ornyn toltyrýdyń jeke marshrýtyn ázirleýi qajet. Bilim jáne ǵylym mınıstrligi aýyl jáne qala mektepterindegi bilim sapasynyń alshaqtyǵyn azaıtý tetikterin oılastyrýy mańyzdy.

Úshinshiden, Bilim jáne ǵylym mınıstrligi Aqparat jáne qoǵamdyq damý mınıstrligimen birlesip, dástúrli jáne aralas oqytý formatyn uıymdastyrý erekshelikteri, sonymen birge oqý prosesiniń sanıtarlyq-epıdemıologıalyq qaýipsizdigin qamtamasyz etý tetikteri týraly ata-analar úshin tolyqqandy ári keń aýqymdy túsindirý jumystaryn júrgizýi qajet.

Tórtinshiden, jergilikti atqarýshy bılik organdary bas sanıtar dárigerlermen birlesip, offlaın negizde synypqa keletin 25 oqýshynyń naqty krıterıılerin anyqtap, aımaqtaǵy epıdemıologıalyq jaǵdaıǵa baılanysty dástúrli formatta bilim berýge kóshýge ıkemdi sheshim qabyldaýlaryn usyndy.