Memlekettik Eltańbanyń, Almatydaǵy Táýelsizdik monýmentiniń avtory, sáýletshi, aqyn, ǵalym ári qoǵam qaıratkeri Shota Ýálıhanov qaıtys boldy. Bul týraly mádenıet jáne sport mınıstri Aqtoty Raıymqulova habarlady.

"Qazaqstan Respýblıkasy Mádenıet jáne sport mınıstrliginiń atynan kórnekti sáýletshi, profesor, Qazaqstannyń eńbek sińirgen qaıratkeri Shot-Aman Ydyrysuly Ýálıhanovtyń qaıtys bolýyna baılanysty otbasy men jaqyndarynyń qaıǵysyna ortaqtasyp, kóńil aıtamyn.

Sh. Ydyrysuly sanaly ǵumyryn súıikti isine arnap, maǵynaly ómir súrgen óz ortasyna syıly, bolmysy bólek jan edi. Ol halqymyzdyń tarıhyndaǵy ardaqty tulǵalardyń eskertkishin jasap, er esimin el arasynda ulyqtaýǵa, sáýleti kóz tartar ǵımarattardyń boı kóterýine súbeli úles qosty. 

Segiz qyrly, bir syrly aǵamyz elimizdiń sáýlet jáne beıneleý óneriniń ózekti máselelerin kótergen kóptegen ǵylymı maqalamen qatar birqatar dramalyq shyǵarma jazdy. Olardyń qatarynda "Taǵdyr", "Shoqannyń anty", "Aqnur", "Shoqannyń aq túnderi", "Terror" atty pesasy bar.

Ǵıbratty azamattyń asyl beınesi, eren eńbegi týǵan-týys pen qalyń qazaqtyń kóńil tóri men júrek túkpirinde máńgi saqtalady" delingen habarlamada.

Shot-Aman (Shota) Ydyrysuly Ýálıhanov 1932 jyly 26 sáýirde Kókshetaý óńirindegi Aıyrtaý aýdany, Syrymbet aýylynda dúnıege kelgen.

Kazgorodok (qazirgi Syrymbet) orta mektebin kúmis medalmen támámdaǵan Shota Ýálıhanov 1950 jyly Máskeý sáýlet ınstıtýtyna oqýǵa túsip, ony 1956 jyly bitirgen.

Eńbek jolyn Almaty qalasyndaǵy "Kazgorstroıproekt" memlekettik jobalaý ınstıtýtynda sáýletshi bolyp bastaǵan.