Turǵyndarǵa COVID-19-ǵa qarsy ekpe salý jáne vaksınalardy aımaqtarǵa bólý «Nur Otan» partıasynyń baqylaýyna alynady. Bul týraly Partıalyq baqylaý komıtetiniń birinshi uıymdastyrýshylyq otyrysynda belgili boldy. Jıynda jańa quram bekitilip, aldaǵy jylǵa arnalǵan jumys jospary anyqtaldy.

Partıanyń baspasóz qyzmeti habarlaǵandaı, óńirlerdegi partıalyq baqylaý komıteti men komısıalarynyń birinshi kezektegi mindeti – elektoraldyq mindettemelerdiń oryndalýyna júıeli baqylaýdy qamtamasyz etý.

Sondaı-aq ózekti baǵyttardyń qatarynda memlekettik organdardyń azamattardyń ótinishterine tıanaqty qarap, sapaly jumys isteýine, búdjet qarajatyn jumsaýdyń tıimdiligine monıtorıń júrgizý sıaqty taǵy da basqa máseleler bar.

Partıa janyndaǵy Sybaılas jemqorlyqqa qarsy is-qımyl jónindegi respýblıkalyq qoǵamdyq keńestiń de jumys kestesi men jańa quramy birinshi otyrysta bekitildi.

– Sybaılas jemqorlyq – bul para berý men para alý ǵana emes. Óz mindetterine nemquraıly qaraý jáne búdjet qarajatyn tıimsiz jumsaý da sonyń kórinisi. Onymen barlyq sharalardy qoldana otyryp kúresýimiz qajet, – dedi Erlan Saırov.

Buǵan deıin «Nur Otan» Tóraǵasynyń birinshi orynbasary Baýyrjan Baıbek óziniń Facebook-tegi paraqshasynda bıleýshi partıanyń óziniń saılaýaldy ýádelerin iske asyrýdy qalaı qamtamasyz etýge nıetti ekenin aıtqan bolatyn.

Onyń aıtýynsha, Elbasy, partıa Lıderi Nursultan Nazarbaevtyń tapsyrmasy boıynsha, sondaı-aq el prezıdenti Qasym-Jomart Toqaevtyń «Halyq únine qulaq asatyn memleket» tujyrymdamasyn iske asyrý aıasynda partıanyń qoǵamdyq keńesteriniń jumysy júıeli túrde qaıta qurylymdalady.

Saıası keńes Búrosynyń sheshimimen taratylǵan partıalyq kýratorlar ınstıtýtynyń oryna «Nur Otan»-nyń saılaýaldy baǵdarlamasynyń naqty baǵyttarynyń iske asyrylýyn baqylaý boıynsha 14 respýblıkalyq qoǵamdyq keńes quryldy. Osyndaı keńester óńirlik deńgeıde de qurylady.

Keńesterdiń jumysy qoǵamdyq pikirdi eskerip, sondaı-aq partıanyń qoǵamdyq qabyldaý bólmelerine el kóleminde azamattardan túsken ótinishterge jasalǵan taldaýǵa negizdele otyryp, jarıa túrde júrgiziledi.

Sonymen qatar, Baýyrjan Baıbek «Nur Otan» keńesteriniń aldynda sarapshylar qaýymdastyǵyn ótkir áleýmettik máselelerdi ashyq talqylaýǵa tartý, sondaı-aq azamattyq bastamalardy qoldaý mindeti turǵanyn atap ótti.