Jospar boıynsha aı saıyn 2 mln adamdy vaksınasıalaý qamtamasyz etiledi. Bul týraly premer-mınıstr Asqar Mamın úkimet otyrysynda aıtty.

– Pandemıamen baılanysty jaǵdaı kúrdeli ekenin kórip otyrmyz. Qazirdiń ózinde 8 aımaq "qyzyl aımaqqa" endi. Aýrýhanalardaǵy oryndardyń júktelýi 41 paıyzdy, al reanımasıalyq oryndardyń júktelýi 27 paıyzdy qurap otyr. Vırýstyń reprodýktıvtilik ındeksi – 1,15 paıyz. Densaýlyq saqtaý mınıstrligi men ákimdikter aýrýhanalardaǵy oryndardyń tolyq daıyndyǵyn qamtamasyz etýi qajet. Bizdiń mindetimiz – sanıtarıalyq-epıdemıologıalyq jaǵdaıdy turaqtandyrý jáne vaksına alatyndardyń sanyn arttyrý, – dedi Mamın.

Úkimet basshysy densaýlyq saqtaý mınıstrligi men ákimdikterge birqatar tapsyrma júktedi.

– Birinshi, ákimder epıdemıologıalyq jaǵdaıǵa baılanysty jedel shekteý sharalaryn qabyldasyn. Barlyq emdeý mekemeleri dárilik zattar men medısınalyq buıymdardyń qajetti kólemimen tolyǵymen qamtamasyz etilýi kerek. Óńirlerde sanıtarlyq normalar men betperde rejımin saqtaýdy kúsheıtý qajet.

Ekinshi, vaksınasıalaý grafıgi naqty saqtalsyn jáne sáýir aıynda, sondaı-aq mamyr men maýsym aılarynda jospar boıynsha aı saıyn 2 mln adamdy vaksınasıalaý qamtamasyz etilsin. Sondyqtan densaýlyq saqtaý mınıstrligi men ákimdikterge qoǵamdyq oryndardy, sonyń ishinde saýda ortalyqtaryn paıdalana otyryp, vaksınasıalaýdyń qoljetimdiligin qamtamasyz etýdi tapsyramyn, – dedi premer-mınıstr.