Kóptegen elder Tramptyń prezıdenttikten ketýin kútip júrgeni belgili bola bastady. Óıtkeni qandaı da bolsyn Reseıge qatysty máseleler týyndasa, Tramp ony qaramaıtyny nemese artyn sıyrquıymshaqtandyryp jiberetini aıqyn boldy.

Ony kórip otyrǵan elder báribir bul baǵytta eshteńe ónbeıtinin, jetekshi derjavanyń nemquraıly, keıde tipti ózderine kiná artyp Reseıdi aqtaýǵa tyrysatynyn bilip kóp nárseni keıinge qaldyrdy, basqa prezıdenttiń kelýin kútkendeı boldy. Eger Tramp qaıta saılana qalsa, odan tek avtorıtarlyq elder ǵana utatyn edi, ásirese Reseıdiń qudaıy beretin edi.

Baıden saılanǵaly, Amerıka burynǵy, álemde qalyptasqan óziniń jetekshi róline qaıtyp kele bastady. Qaýipsizdik týraly Múnhen konferensıasynda, G7 Samıtinde sóılegen sózderinde ol NATO alánsyn qyzý qoldap, Eýroodaq elderi arasynda paıda bolǵan túsinispeýshilikterdi joıýǵa tyrysty. Osyny sezgen keıbir elder burynǵy pozısıalaryn batyl bildire bastady.

Polsha Bas prokýratýrasy Smolensk túbindegi ishinde prezıdent Kachınskıı jáne 70 Polsha basshylyǵy men elıtasy bar ushaq apatyn tergeý merzimin 2021 jyldyń aıaǵyna deıin uzartty. Bas prokýratýranyń pikirinshe, apat terakt saldarynan bolǵan. Apat ornynan tabylǵan "qara jáshik" Reseıde jáne ondaǵy jazbalar ózgertilgen degen kúdik bar. Tergeýmen aınalysyp jatqan halyqaralyq top jyl aıaǵyna deıin jumysty aıaqtap, sońǵy qorytyndy pikirdi aıtýǵa tıis deıdi bas prokýratýra. Sondaı-aq basqa da prosesýaldyq sharalar, ondaǵan kýálerden jaýap alý júrip jatyr.

London soty Pýtındi synaǵan "Aeroflottyń" burynǵy top-menedjeri Glýshkov London mańyndaǵy óziniń jekemenshik úıinde tunshyqtyrylyp óltirilgen dep tanydy. Bul burynǵy FSB ofıseri Sergeı Skrıpal men onyń qyzynyń "Novıchokpen" ýlanǵanynan bir apta ótken soń júzege asqan.

Al jalpy Tramptyń jaǵdaıy qalaı? Manhetten prokýratýrasy Tramptyń salyq deklarasıasyn, qarjylyq qujattaryn jáne Tramptyń salyqtaryn júrgizgen fırmanyń jazysqan hattaryn sot arqyly qolǵa túsirgesin jumysqa jańa tergeýshi qabyldap jatqany belgili boldy.

Shamasy onda birtalaı "qyzyqtar" bar sıaqty. Jańa tergeýshi buryn FBR-de býhgalter-krımınalıst bolyp jumys istegen. Bul is te osy jyldyń aıaǵyna deıin aıaqtalýǵa tıis.

Qýanysh Edilhantegi

Sholýshy