Jyl saıyn 50 úzdik ǵylymı qyzmetkerge 5 mln teńge kóleminde syıaqy taǵaıyndalady. Bul týraly bilim jáne ǵylym mınıstri Asqat Aımaǵambetov facebook paraqshasynda jazdy.
– Búgin – Qazaqstandaǵy ǵylym qyzmetkerleriniń kúni. Kúntizbedegi bul data kezdeısoq tańdalmaǵany belgili. 12 sáýir – Ǵylym akademıasynyń tuńǵysh prezıdenti, kórnekti ǵalym-geolog Qanysh Sátbaevtyń dúnıege kelgen kúni.
Elimizdegi ǵylym salasynyń áleýeti zor. Máselen, bıologıalyq qaýipsizdik problemalary ǵylymı-zertteý ınstıtýty ǵalymdarynyń koronavırýsqa qarsy ázirlegen vaksınasyn erekshe atap ótýge bolady. Ǵylymdy respýblıkalyq búdjetten qarjylandyrý kólemi sońǵy eki jylda shamamen eki esege artty. 2025 jylǵa qaraı ǵylymdy qarjylandyrý kólemin jalpy ishki ónimniń 1% deıin ulǵaıtý josparlanǵan. Bul – otandyq ǵylymnyń damýyna úlken serpin bereri sózsiz. Eger buǵan deıin bilim jáne ǵylym mınıstrliginiń granttyq jáne baǵdarlamalyq-nysanaly qarjylandyrýǵa arnalǵan konkýrstary úsh jylda bir ret júrgizilse, endi olar jyl saıyn ótkiziletin bolady. Tek 2020 jyly 5 konkýrs ótkizilgenin atap ótý qajet, – dedi ol.
Aımaǵambetovtiń aıtýynsha, byltyr doktoranttardyń stıpendıasy 80 paıyzǵa kóbeıgen.
– Taǵy bir mańyzdy jaıt, 2020 jyly alǵash ret granttardyń jańa túrleri bekitildi. Olar – kollaborasıa boıynsha, qysqa merzimdi, jeke, jas ǵalymdarǵa arnalǵan jáne t.b granttar. Sondaı-aq doktoranttardyń stıpendıasy 80%-ǵa ulǵaıdy. Budan bylaı olardyń stıpendıasy jyl saıyn 15%-ǵa ósip otyrady jáne 2025 jylǵa qaraı 260 myń teńgeni quraıtyn bolady, – dep jazdy mınıstr.
Onyń aıtýynsha, endi jyl saıyn 50 úzdik ǵylymı qyzmetkerge 5 mln teńge kóleminde syıaqy taǵaıyndalady.
– 2021 jyldan bastap biz myqty, bedeldi ǵylymı jýrnaldardy qoldaý jónindegi jobany iske asyrýdy bastaımyz. Taǵy bir jańalyq – endi jyl saıyn 50 úzdik ǵylymı qyzmetkerge 5 mln teńge kóleminde syıaqy taǵaıyndalady. Mundaǵy mehanızm "JOO úzdik oqytýshysy" konkýrsyna uqsas bolady. Bul "Ǵylym týraly" zańǵa engizilgen jańa túzetýlerge sáıkes múmkin bolyp otyr, – dedi Aımaǵambetov.
Pikir qaldyrý