Prezıdent Qasym-Jomart Toqaev Qazaqstanǵa jumys saparymen kelgen Eýropadaǵy qaýipsizdik jáne yntymaqtastyq uıymynyń qazirgi tóraǵasy, Shvesıanyń Syrtqy ister mınıstri Ann Lındeni qabyldady.

Aqorda saıtynyń málimetinshe, Toqaev shved dıplomatyna iltıpat bildirip, onyń elge jasaǵan sapary EQYU-nyń qazirgi tóraǵasy retinde de, Shvesıanyń syrtqy saıası vedomstvosynyń basshysy turǵysynan da óte mańyzdy ekenin atap ótken.

– Qazaqstan Eýropadaǵy qaýipsizdik jáne yntymaqtastyq uıymynyń qaǵıdattary men qundylyqtaryna beıil ekenin aıtqym keledi. Siz basqaryp otyrǵan Uıymmen aradaǵy yntymaqtastyq – syrtqy saıasattaǵy basymdyqtarymyzdyń biri. Biz atalǵan Uıymmen de, oǵan múshe memlekettermen de aradaǵy tyǵyz yqpaldastyqty nyǵaıta túsýge daıynbyz, – dedi Qasym-Jomart Toqaev. 

Prezıdent ekijaqty baılanystardyń perspektıvalaryn talqylaý barysynda Qazaqstannyń Shvesıamen aradaǵy ózara yqpaldastyqty ekonomıkalyq jáne gýmanıtarlyq salalarǵa basa mán bere otyryp, odan ári nyǵaıtýdy kózdeıtinine toqtalǵan.

Ann Lınde Qasym-Jomart Toqaevqa EQYU-nyń qazirgi tóraǵasy laýazymyndaǵy óz jumysynyń alǵashqy qorytyndylary, aldaǵy jumystary, onyń ishinde, Ortalyq Azıa baǵytyndaǵy jumys josparlary týraly málimet bergen.