Májilis tóraǵasy Nurlan Nyǵmatýlın Belgıa Koróldiginiń Federaldyq parlamenti ókilder palatasynyń spıkeri Elıan Tılómen beınekonferensıa formatynda kezdesý ótkizdi.

Taraptar eki el arasyndaǵy yntymaqtastyqty, onyń ishinde parlamentaralyq baılanysty arttyrý jaıynda pikir almasty.  

Nurlan Nyǵmatýlın Belgıa Qazaqstannyń Eýropadaǵy mańyzdy saıası jáne ekonomıkalyq áriptesi ekenine nazar aýdara otyryp, eki el arasyndaǵy strategıalyq seriktestik deńgeıine jetýdegi tuńǵysh prezıdent – Elbasy Nursultan Ábishuly Nazarbaevtyń rólin atap ótti.

Sonymen qatar, kezdesýdegi negizgi taqyryptardyń biri – memleket basshysy Qasym-Jomart Toqaev bastamashy bolǵan eldiń saıası júıesin jańǵyrtý máseleleri týraly boldy.

Nurlan Nyǵmatýlın memleket pen qoǵam arasyndaǵy dıalogty keńeıtý, sondaı-aq osy baǵyttaǵy qazaqstandyq zańnamany jetildirý týraly aıtty.

Taraptar Qazaqstan-Belgıa qarym-qatynastarynyń mańyzdy quramdas bóligi retinde parlamentaralyq baılanysty jandandyrýdy qoldady.

Óz kezeginde Elıan Tıló Qazaqstandy óziniń damý jolyn usynǵan memleket ekenin, búgingi tańda qarqyndy túrde damyp kele jatqanyn alǵa tartty. Sonymen qatar, qos memleket arasyndaǵy dıplomatıalyq qatynastyń ornaǵanyna 30 jyl tolatynyn atap ótip, qalyptasqan saıası-ekonomıkalyq baılanysty odan ári nyǵaıtýǵa nıetti ekenin jetkizdi.

Otyrys barysynda Nurlan Nyǵmatýlın men Elıan Tıló zańnamalyq tájirıbe almasý, yntymaqtastyq jónindegi parlamenttik toptar men komıtetterdiń ózara is-qımyly eki eldiń jan-jaqty áriptestigin ilgeriletýge yqpal etetinine senim bildirdi.

Májilistiń baspasóz qyzmeti